«Bastau Bıznes»: Qyzylordalyqtar respýblıkada birinshi bolyp jobalaryn qorǵady
QYZYLORDA. QazAqparat - Qyzylorda oblysy kásipkerler palatasynyń alańynda «Bastau Bıznes» jobasyna qatysýshylar bıznes-josparlaryn qorǵaýda.
«Qyzylordalyqtar respýblıka kóleminde qorǵaý jumystaryn birinshi bolyp bastady»,-deıdi Palatanyń sarapshysy Janat Materzaeva. Bul týraly QazAqparat tilshisi oblystyq kásipkerler palatasyna silteme jasap habarlady.
«Bastau Bıznes» jobasynyń alǵashqy "qarlyǵashtaryna" bir aı boıy alǵan bilimderiniń nátıjesin kórsetetin sát jetti. 10 mamyrdan bastap oblysqa qarasty Aral, Qazaly, Qarmaqshy, Shıeli, Jańaqorǵan aýdandarynyń jobaǵa qatysqan azamattary Qyzylorda qalasynda bıznes-josparlaryn qarjy ınstıtýttary men memlekettik organ ókilderinen qurylǵan oblystyq komıssııanyń aldynda qorǵaýda.
Aıta ketý kerek, pılottyq negizde júzege asyrylyp jatqan jobanyń alǵashqy kezeńinde testileýden 228 adam ótken bolatyn. Endi olardyń 128-i oblystyq komıssııa aldynda jobalaryn qorǵamaq.
«128 azamat «Bastau Bıznes» jobasynyń barlyq kezeńinen ótti. Oblystyq komıssııa aldynda jobalaryn sátti qorǵaı alǵandarǵa arnaıy sertıfıkattar tapsyrylyp, qarjy ınstıtýttary qarjylandyrý sharalaryn júrgizý barysynda birinshi kezekte basymdyqty osy jobalarǵa bermek», - deıdi Kásipkerler palatasynyń mamany Janat Materzaeva.
Aıta ketý kerek, oblystyq komıssııa aldyna jalpy quny 558 mln teńgeni quraıtyn 128 joba usynylyp otyr.
