«Bastaý» baǵdarlamasy: Aqtóbe oblysynyń aýdandarynda shaǵyn tsehtar betperde tige bastady
AQTÓBE. QazAqparat – Aqtóbe oblysy ákiminiń orynbasary Qaırat Bekenov óńirdegi betperde tapshylyǵyn joıý baǵytyndaǵy jumystarymen bólisti, dep habarlaıdy QazAqparat tilshisi.
Aqtóbe oblysynda 147 myńnan astam adam shaǵyn jáne orta bızneste eńbek etedi. Іri óndiris oryndarynda 80 myńnan astam adam jumys istep júr. Qazir kınoteatr, demalys oryndary jabyldy.
«Shaǵyn jáne orta bıznesti qoldaý maqsatynda áleýmettik jeli arqyly arnaıy chattar ashylyp, olardyń máseleleri onlaın talqylanyp jatyr. Kásipkerler arasynda saýalnama júrgizildi. Salyqtyń ýaqytsha toqtatylýyn kóbi oń qabyldady. Tek shıkizatty shetelden tasymaldaıtyn kompanııalarda qıyndyqtar bar. Úkimet shtabyna habar berilip, taýardy jetkizý máselesi sheshilip jatyr. Týrızmge qatysty da suraqtar boldy. Jeke balabaqsha, qosymsha sabaq berý de qıyndady. Kóbi jalǵa ǵımarat alyp otyr. Osy kezde ǵımaratty jalǵa berip otyrǵandarmen kelisimge kelip, jeńildik qarastyrý suraldy. Bári de bir-birine kómek berýde. Qazir eń bastysy – qaýipsizdik, amandyq», - dedi oblys ákiminiń orynbasary Qaırat Bekenov.
Óńirde shaǵyn jáne orta bızneske eskertý berildi. Betperde kııý mindettelip, zararsyzdandyrý jumystary baqylaýǵa alyndy. Eger eńbek demalysynyń ýaqyty kelse, osy kezde jumysshylardy ýaqytsha bosatýǵa bolady. Qyzmet kórsetý oryndary da onlaın tártipke kóshti.
«Áleýmettik jelini baqylap otyrmyz. Betperde máselesi jıi qozǵalyp jatyr. «Bastaý» baǵdarlamasy arqyly aýdandarda 20 tigin tsehy ashylyp, onda betperde tigilip jatyr. Dákeden tigiledi. Óte yńǵaıly, jýyp, útiktep, qoldanýǵa bolady. Al medıtsınalyq betperde tigetin arnaıy tseh jumysyn kúsheıtti. Dákeden jasalǵan betperde jaqsy. Sondyqtan Túrkistan oblysyna 1 mln sharshy metr dákege tapsyrys berildi. Suranysty tolyq qamtý josparda bar. Maqta matadan da betperde tikken paıdaly. Biz úshin qazir qaýipsizdik basty orynda tur», - dedi oblys ákiminiń orynbasary Qaırat Bekenov.
Onyń aıtýynsha, barlyq bazardaǵy dáke qory anyqtaldy. Dákeniń bári satyp alynyp, tigin tsehtaryna jiberilip jatyr. Kóbi qyzmet kórsetý salasyna tegin taratylady.
Aıta keteıik, óńirde qurylǵan arnaıy komıssııa quramynda densaýlyq saqtaý, eńbek ınspektsııasynyń qyzmetkerleri de bar.
«Kásipkerler nesıeni toqtatý, sýbsıdııa týraly jeńildikter jaıyn biledi. Talap boıynsha aldymen bankterge ótinish berilýi tıis. Keıin qosymsha sheshim qabyldaý úshin qorǵa aqparat túsedi. Ázirge kásipkerlerden aryz túspedi», - dedi «Damý» Qorynyń oblystyq fılıal dırektory Berik Nurǵalıev.
