Bastary jeke sómkede: Meksıkada tasjol boıynan basy joq deneler tabyldy

ASTANA. KAZINFORM – Meksıka ulttyq gvardııasynyń ofıtserleri Halısko shtatyndaǵy Lagos-de-Moreno men San-Lýıs-Potosı qalalarynyń arasyndaǵy jolda bes basy joq máıitti tapty. Máıitter qara polıetılen paketterge oralǵan kúıinde tabylǵan. Taǵy bir sómkede olardyń bastary bolǵan, biraq olardyń jasyn dál qazir anyqtaý múmkin emes, dep habarlaıdy Expansion politica.

Basylymnyń málimetinshe, Halısko shtatynda kartelder men qýatty qurylymdar arasyndaǵy qaqtyǵystar men vandalızm áreketteri bir aıdan astam ýaqyt boıy jalǵasýda. Bul jaǵdaı narkobaron Hoakın Gýsmannyń uly Hoakın Gýsman Lopes pen Sınaloa karteliniń negizin qalaýshy Ismael Zambada Garsıa tutqyndalǵannan keıin bastaldy.

Jergilikti aqparat quraldarynyń habarlaýynsha, qaqtyǵystar Hoakın Gýsmannyń balalary bastaǵan Los-Chapıtostyń eki toby men jaqynda tutqynǵa alynǵan Ismael Zambada Garsııa bastaǵan Los-Maıos karteliniń arasynda bolyp jatyr.

Eldegi qoǵamdyq tártipti saqtaý úshin armııa men ulttyq ulannyń úlken kontıngenti jumyldyrylǵany atap ótildi. Atap aıtqanda, Sınaloa shtatynyń astanasy Kýlıakan qalasynda qoǵamdyq tártipti saqtaý úshin 22000 sarbaz ben túrli qarýly kúshterdiń qyzmetkerleri jumyldyrylǵan. “Espejo” jýrnalynyń habarlaýynsha, sońǵy bir aıda osy qaqtyǵystar saldarynan 200-den astam adam qaza taýyp, 234 adam iz-túzsiz joǵalǵan.

Resmı derekter boıynsha, bıylǵy jyldyń qańtar-qyrkúıek aılary aralyǵynda Halısko shtatynda 1415 adam qaza tapqan. 2006 jyly úkimet esirtki saýdasymen kúresý úshin áskerdi jumyldyrǵannan beri Meksıkada 450 myńnan astam adam qaza taýyp, myńdaǵan adam habar-osharsyz ketken.