Bastapqy medıtsınalyq-sanıtarlyq kómektiń róli kúsheıedi - Aıbatyr Jumaǵulov
NUR-SULTAN. QazAqparat - Bastapqy medıtsınalyq-sanıtarlyq kómek uıymdary, ıaǵnı, emhanalar halyq densaýlyǵynyń irgetasy. Sondyqtan memleket osyndaı kómek kórsetetin densaýlyq saqtaý nysandaryn damytýǵa erekshe den qoıyp otyr.
Bul týraly «Áleýmettik medıtsınalyq saqtandyrý qory» KEAQ basqarma tóraǵasy Aıbatyr Jumaǵulov málimdedi.
Qor baspasóz qyzmetiniń habarlaýynsha, qazir 2020 jyly engiziletin medıtsınalyq saqtandyrý júıesine qyzý daıyndyq júrip jatyr. Reformaǵa daıyndyq kezeńinde mindetti áleýmettik medıtsınalyq saqtandyrý jáne kepildendirilgen tegin medıtsınalyq kómek paketterine enetin qyzmetter tizimi qaıta qaralyp, tolyqtyryldy.
Bul pakettiń jańa úlgisinde bastapqy medıtsınalyq-sanıtarlyq kómektiń róli kúsheıtildi. Osyǵan baılanysty, Qor basshysy bastapqy medıtsınalyq-sanıtarlyq kómek nysandarynyń jumysy nátıjeli bolýy úshin jalpy praktıka dárigerlerine túsetin júktemeni azaıtýdyń mańyzdylyǵyn atap ótti.
«2019 jyldyń basynda elimiz boıynsha 1 dárigerdiń júktemesi 1789 adamǵa deıin qysqarǵan. Jospar boıynsha, 2025 jylǵa qaraı atalǵan júkteme 1500-ge deıin azaıýy tıis. Bastapqy medıtsınalyq-sanıtarlyq kómekti damytýǵa baǵyttalǵan bastamalardyń biri - aýyldarda ár 1500 adamǵa dárigerlik ambýlatorııa salý. Josparlanǵan jumystar ambýlatorııa sanyn 2,2 esege arttyrýǵa múmkindik bermek», - deıdi Aıbatyr Jumaǵulov.
Sonymen qatar, Medıtsınalyq saqtandyrý qory memlekettik tapsyrys sheńberinde kórsetiletin qyzmetterdiń aqysyn tóleýmen qatar, onyń sapasyn da baqylaıdy.
Aıta keterligi, 2018 jyly Qor halyqqa tegin kómek kórsetý barysynda olqylyqtarǵa jol bergen medıtsına uıymdarynan 6,3 mlrd teńge qaıtaryp alǵan.
Qor basshysynyń aıtýynsha, qazirgi tańda monıtorıng menshik quqyǵyna qaramastan, memlekettik tapsyrys alǵan barlyq medıtsına uıymdarynda júrgiziledi.
«Kórsetilgen medıtsınalyq kómektiń sapasyna baqylaý kúsheıtildi. Sonymen qatar, túrli kemshilikter men olqylyqtarǵa jol bergen medıtsına uıymdaryna salynatyn aıyppul kólemi de ósti. Máselen, belgili bir qyzmettiń kórsetilgeni rastalmasa 300%, turǵyndy zańsyz (azamattyń qalaýynsyz) tirkegen jaǵdaıda 100% aıyppul salynady. Munyń bári zań buzýshylyqtardy boldyrmaý maqsatynda qolǵa alynyp otyr», - dedi Aıbatyr Jumaǵulov.
Budan bólek, Qor basshysy Medıtsınalyq saqtandyrý qorynyń qyzmetindegi tsıfrlandyrý jumystaryna toqtalyp ótti.
Onyń aıtýyna qaraǵanda, bul baǵyttaǵy sharalar Qordyń ǵana emes, medıtsına uıymdardyń da jumysyn jeńildetip, qujat rásimdeýge ketetin ýaqytty edáýir qysqartýǵa múmkindik beredi.
