Bastamashy top QR Parlamenti depýtattarynan Elbasy N. Nazarbaevtyń Prezıdenttik ókilettigin respýblıkalyq referendýmda 2020 jylǵa deıin uzartý múmkindigin kózdeıtin QR Konstıtýtsııasyna ózgeris engizý týraly máseleni qaraýdy surady
ASTANA. 12 qańtar. QazAqparat /Marlan Jıembaı/ - Elbasy ókilettigin 2020 jylǵa deıin uzartý jónindegi referendým ótkizýdi usynǵan bastamashy top QR Parlamenti depýtattaryna úndeý joldady.
Atalǵan úndeý mátinimen bastamashyl toptyń jetekshisi Shákárim atyndaǵy Semeı memlekettik ýnıversıtetiniń rektory Erlan Sydyqov búgin elordada baspasóz máslıhaty barysynda tanystyrdy.
Onda atalǵan bastama túrli ulttar men dinder ókilderi, barlyq jastaǵy býyndar men áleýmettik toptar tarapynan búkilhalyqtyq qoldaýǵa ıe bolýy Elbasyna degen asa joǵary senimdi aıǵaqtaıtyndyǵy basa aıtylǵan. Sondaı-aq bul qoldaý elimizdiń Tuńǵysh Prezıdentiniń memlekettilikti nyǵaıtý, Qazaqstannyń serpindi áleýmettik-ekonomıkalyq damýyn qamtamasyz etý jáne onyń halyqaralyq bedelin arttyrýǵa baǵyttalǵan kóregen saıasatyn shúbásiz moıyndaý bolyp tabylatyndyǵyna dálel bolatyndyǵy basa aıtylǵan.
«Referendým ıdeıasyna qoldaý kórsetken 5 mln. astam qazaqstandyqtardyń atynan sizderden Parlament palatalarynyń birlesken otyrysynyń qaraýyna «Qazaqstan Respýblıkasynyń Prezıdenti - Elbasy N. Nazarbaevtyń Prezıdenttik ókilettigin respýblıkalyq referendýmda 2020 jylǵa deıin uzartý múmkindigin kózdeıtin Qazaqstan Respýblıkasy Konstıtýtsııasyna ózgeris engizý týraly» máseleni shyǵarýlaryńyzdy suraımyz. Bul - búkilhalyqtyq referendýmdy qoldaýǵa qoldaryn qoıyp, ózderiniń bolashaǵy men elimizdiń keleshek damýyn Qazaqstannyń Tuńǵysh Prezıdentimen baılanystyratyn respýblıka saılaýshylarynyń jartysynan astamynyń tikeleı erik-qalaýy»,-delingen úndeýde.
