Bassyzdyqqa barý elimizge abyroı bermeıdi - «Áziret sultan» meshitiniń bas ımamy
«Tarıhtan belgili, qazaq halqy talaı qasiret pen náýbetti bastan keshirdi. Al beıbit zamanda qazir bolyp jatqan jaǵdaı elimizge syn bolyp tur. Er adam ashýlansa sabyrǵa shaqyrý kerek, al arazdassa olardy pátýaǵa shaqyrý qajet deıdi. Ymyraǵa keltirý kerek. Imanı turǵydan aıtsaq, Táýelsizdik ol Allanyń syıy. Al ony saqtap qalý ár adamnyń qolynda. Buny ár musylmannyń bilgeni abzal. Ózderińiz biletindeı, 5 qańtar kúni Memleket basshysy elimizdiń birneshe óńirinde tótenshe jaǵdaı jarııalap, qaýly shyǵardy. Tótenshe jaǵdaı 19 qańtarǵa deıin jalǵasady. Osy ýaqyt aralyǵynda meshitter men basqa qulshylyq oryndary jurtshylyqpen ótetin sharalarǵa shek qoıyldy. Bul Prezıdent qabyldaǵan sheshimdi oryndaý maqsatynda júzege asyp otyr», - dedi Erbolat Júsipov.
Onyń aıtýynsha, Memleket basshysy el qamy men qaýipsizdigi úshin shuǵyl sheshimder qabyldap jatyr jáne oǵan baǵynǵan abzal.
«Memleket basshysy búgingi halyqqa úndeýinde bastysy eldiń tynyshtyǵy men adamnyń amandyǵyna basa nazar aýdardy. Ókinishke qaraı, buzaqylyq saldarynan biraz óńirlerde áleýmettik nysandar, ákimshilik ǵımarattar men adamdardyń jeke múlikteri qıratyldy. Paıǵambarymyz aıtqandaı, eshkim adamǵa zııan keltirmeý kerek, jamandyq jasaýǵa bolmaıdy. Buzaqylar bul qaǵıdattardy attap ketip jatyr jáne Prezıdent demokratııa máselesine erekshe toqtalyp ótti. Erkindik degen adamnyń oıyna kelgenin isteý kerek degen sóz emes. Bassyzdyqqa barý bizdiń elimizge abyroı bermeıdi jáne eldigimizge nuqsan keltiredi», - deıdi ol.
Sondaı-aq, bas ımam qazirgi eldegi jaǵdaı álem nazarynda ekenin eske saldy.
«Álemniń túkpir-túkpirindegi ıslam ǵulamalary men ókilderi qazaq eli úshin duǵa etip jatyr. Olar qazaqstandyq stýdentterdiń jaqsy jaǵyn aıtyp, bizdiń el úshin alańdatýshylyq tanytyp otyr», - dedi meshit ókili.
Aıta ketsek, búgin Memleket basshysy Qazaqstan halqyna úndeý joldady.
