Basshylyǵy týraly tolyq málimet bermegen óndirýshi kompanııalar lıtsenzııasynan aıyrylýy múmkin
ASTANA. QazAqparat - Astanada Qazaqstandaǵy óndirýshi salalardyń ashyqtyq baǵdarlamasyna (ÓSAB) jańa talaptar engizý boıynsha múddeli taraptardyń kezdesýi ótti, dep habarlaıdy QazAqparat tilshisi.
Qazaqstan 2020 jylǵa qaraı óz basshylary týraly málimetterdi ashyq ustaıtyn elder qataryna qosylýdy josparlap otyr. Óndirýshi kompanııalardyń basshylary týraly aqparatty jarııalaý men esepterdi ózge ashyq aqparattarmen sáıkestendirý - ÓSAB talaptarynyń biri.
«Óndirýshi kompanııalardyń túpki basshylaryn anyqtaý talaby halyqaralyq basqarý bekitken jańa standarttarda kórsetilgen. ıAǵnı, Qazaqstan bul álemdik bastamaǵa qosyldy jáne jańa talaptarǵa sáıkes ulttyq zańnama jasaýǵa mindetteldi», - dedi Jergilikti ózin-ózi basqarý ınstıtýtynyń dırektory Sergeı Hýdıakov «Grand park Esil» qonaq úıinde ótken jınalysta.
Onyń aıtýynsha, Qazaqstanda respýblıkalyq bıýdjettiń 50 protsenti ekonomıkanyń óndirýshi sektorynan quralady.
«Sondyqtan, óndirýshi salalardyń tabysy memleket paıdasyna jumsalyp, áleýmettik máselelerdiń sheshilgenin qalaımyz. Ondaǵy sybaılas jemqorlyq qaýpin azaıtý úshin barlyq protsester ashyq bolýy tıis. Alǵashqy kezeńde aqparat memlekettik basqarýdyń biregeı portalyna jınalady. Bul aqparat memlekettik qyzmetshiler úshin qoljetimdi bolady. Ulttyq keńeste bul másele talqylanǵan soń óndirýshi kompanııalardyń basshylary týraly aqparat qalyń jurtshylyqqa qoljetimdi bolmaq», - dep túsindirdi ol.
Ázirge qazaqstandyq óndirýshi kompanııalardyń 65 protsenti óz basshylyǵy týraly málimetterdi jarııalaǵan.
«Árıne, kompanııalardyń qýanyp otyrǵany shamaly. Bir jaǵynan búkil órkenıetti álem osy baǵytqa bet buryp keledi. Kompanııa aktsııalarynyń bırjadaǵy quny salymshylardyń kompanııa qyzmetine senimine tikeleı baılanysty bolady. Olardyń jumys ashyqtyǵy kompanııa qunyn arttyrady», - deıdi S. Hýdıakov.
Sonymen birge, sarapshylar erejeni saqtamaǵan kompanııalarǵa aıyppuldy kóbeıtip, óndirý lıtsenzııasynan aıyrý sharalaryn engizýdi usynyp otyr.
