Basshylardyń kabıneti tıisti normadan aspaýy shart - erejeniń talaby
Astana qalalyq departamenttiń basshysy Jazıra Jylqyshıevanyń aıtýynsha, qazirgi ereje boıynsha mektep dırektorlarynyń kabıneti 32 sharshy metrden aspaýy qajet. Al qabyldaý bólmesi 12 sharshy metr bolýy shart. Basqa memlekettik organdardyń basshylaryna qatysty naqty normalar da bar.
«Negizi, mınıstrlikterdiń ózderiniń normalary bar. Bilýimshe, 45 sharshy metr. Biraq biz úshin, aýmaqtyq department basshylary úshin 25 sharshy metr. Meniń kabınetim sondaı bolýy qajet. Al qabyldaý bólmesi 10 metrden aspaýy shart. Ákimdikke qaraıtyn basqarma basshylarynyń kabınetteri de solaı. Bul - naqty erejeniń normasy. Qazirgi kezde biz basshylardyń birinshi qabatta ornalasýy boıynsha usynys jazyp jatyrmyz. Sony qaraýǵa engizemiz. Óıtkeni búgingi erejede basshylardyń birinshi qabatta otyrýy tıis degen norma joq. Al norma bolmaǵannan keıin barlyǵy ústine shyǵyp, kabınetterin keńeıtip alǵan. Ony mektepterdi tekserý kezinde baıqadyq. Kabınettiń arǵy jaǵynda taǵy bir kabınet bar, qabyldaý bólmeleri qandaı. Búginde Astanadaǵy mektep dırektorlary bizdiń bastamamyzdy qoldady. Birneshe mekteptiń dırektory birinshi qabatqa tústi. Al olardyń burynǵy kabınetterinde oqýshylar sabaq oqıtyn boldy», - dedi J.Jylqyshıeva QazAqparat tilshisine bergen suhbatynda.
Onyń sózine qaraǵanda, keńester kezinde jaqsy bir tájirıbe bolǵan. Mektep dırektorlary ǵımarattyń birinshi qabatynda otyryp, oqýshylarǵa da, ata-analarǵa da barynsha jaqyn boldy. «Biz ózimiz keńester kezinde mektepte oqyǵan edim. Sol kezde mektep basshylyǵy, barlyq dırektorlar birinshi qabatta ornalasatyn. Bizdi kútip alady, shyǵaryp salady. Ata-analarmen únemi aralasyp turatyn. Ókinishke qaraı, sońǵy kezde biz osy bir jaqsy tájirıbeni joǵaltyp aldyq. Ony jańǵyrtý qajet», - deıdi J.Jylqyshıeva.
Aıta keteıik, aktsııanyń alǵashqy kezeńinde mektep basshylarynyń kabınetteri normadan eki-úsh esege artyq ekeni anyqtaldy. Máselen, №54 mektep-lıtseıde dırektor 90 sharshy metrdi qamtıtyn jumys, demalys jáne qabyldaý bólimderin bosatyp berdi. Qazir ol jerde muǵalimderge arnalǵan jumys bólmesi ornalasty. Dırektordyń jańa kabıneti 13 sharshy metr boldy. Sol sııaqty 17-shi mektep-dırektorynyń kabınetin 40 sharshy metr bolsa, qazir ol birinshi qabatqa aýystyryldy. Burynǵy kabınette oqýshylar robototexnıka jáne shyǵarmashylyq shyńdaý boıynsha bilim alýda.
№80 mektep-gımnazııasynyń dırektory da jańa aktsııany qoldady. Ol 53 sharshy metrdi bosatyp berdi. Qazir ol jerde qosymsha sabaqtar ótip jatyr. 71-shi mektep-lıtseı de solaı. Dırektory 50 sharshy metrdi bosatyp, birinshi qabatqa kóshti.
«Búginde atalǵan mektepterdiń basshylyǵy astynda otyryp, bárin kórip otyrady. Oqýshylardyń kirgenin-shyqqanyn jáne basqa da jaǵdaılardy baqylaýǵa múmkindik bar. Halyqqa jaqyn bolý degen osy. «Osyny ózderińiz oılamadyńyz ba?» dep surasaq, joq deıdi», - dep atap kórsetti J.Jylqyshıeva. «Jańa format» aktsııasy medıtsına mekemelerinde jalǵasady.
Illıýstratsııalyq sýret