Basshylardyń bylyǵyn áshkerelegen aspazdardyń basy bálege qaldy
AQTÓBE. QazAqparat - Aqtóbe oblystyq Eset batyr atyndaǵy daryndy balalarǵa arnalǵan sport mektep-ınternatynyń aspazdary «basshylar balalarǵa arnalǵan tamaqty jep, úılerine tasıdy» dep prokýratýraǵa shaǵym túsirgen. Keıin janjaldyń ortasynda qalǵan mektep-ınternat basshylyǵy «aspazdar jala japty» dep olardy sotqa berdi. Moraldyq shyǵyn esebinde 800 myń teńge surap otyr. Qazir ınternattyń ashanasynda jumys isteıtin 6 aspazdyń tórteýi jumystan shyǵarylǵan, dep habarlaıdy «QazAqparat» tilshisi.
Qala irgesindegi Eset batyr atyndaǵy daryndy balalarǵa arnalǵan sport mektep-ınternatynda 150-den astam bala bilim alady. Munda oblystyń barlyq aýdan, aýylynda sporttyń kez kelgen túrimen shuǵyldanyp, jaqsy nátıje kórsetip júrgen balalar bilim alady. Búgin jas sportshylardyń asyn daıyndap, dastarhanyn jasap beretin aspazdardy mektep-ınternaty basshylyǵy sotqa berdi.
«Bizdiń aılyǵymyz 28-30 myń teńge. Aspazdar qalanyń ár bóliginde turady, qoǵamdyq kólikpen keledi. Nesıemiz taǵy bar. Bul bir qıyndyǵymyz. Ekinshiden, ınternat basshylary balalardyń tamaǵyna ortaqtasyp, ashanadan aýqattanady. Úshinshiden, balalarǵa dep tasymaldanatyn tamaqtar kóktep, shirip ketken. Barlyq jaıdy aıtyp, prokýratýra, tutynýshylardyń quqyqtaryn qorǵaý basqarmasy men eńbek ınspektsııasyna habar berdik. Sodan soń aspazdardy qýalap, 4 adamdy jumystan shyǵardy. Endi «jala japty» dep sotqa shaǵymdanyp otyr»,- deıdi aspaz Ulbolsyn Smaǵulova.
Aspaz U. Smaǵulovtyń aıtýynsha, mektep basshylyǵy azyq-túlik jetkizýshilerden merzimi ótip ketken taýarlardy qabyldaı beredi eken. Jemis-jıdek pen sút ónimderi jeýge, ishýge jaramaı qalǵan. Munyń bári jalǵan sóz degen mektep basshylyǵy aspazdardy jumystan shyǵardy. Keıin is sotqa tústi.
«Aspazdardyń shaǵymynan soń mektep-ınternatta ishki tekserý júrgizildi. Olardyń merziminen ótip ketti degen málimeti jalǵan bolyp shyqty. Sondyqtan bilim ordasyna daq túsirgenderi úshin isti sotqa berip otyrmyz»,-deıdi mektep-ınternat qorǵaýshysy Gúlnur Aıaǵanova.
№2 qalalyq sotynyń sýdıasy Azamat Qabyldınov, bul is boıynsha psıhologııalyq-fılologııalyq saraptama taǵaıyndady. Qorytyndysy daıyn bolǵan soń is qaıta jalǵaspaq.
Altynaı Saǵyndyqova
