Basshy sanatyndaǵylardyń jalaqysy biliktiligi joq jumysshylardyń aılyǵynan 4,1 esege kóp
ASTANA. QazAqparat - Jumysshylardyń sıpattyq kásipteri jáne qyzmetkerlerdiń laýazymdary boıynsha ortasha aılyq jalaqysynyń kólemi týraly aqparatty alý maqsatynda QR Statıstıka agenttigi ekonomıkalyq qyzmettiń jekelegen túrlerindegi kásiporyndar men uıymdarǵa birjolǵy zertteý júrgizdi. Zertteý qyrkúıek aıynda tolyq jumys istegen jumysshylardy qamtıdy.
2013 jyldyń zertteý nátıjeleri kórsetkendeı, ekonomıkalyq qyzmet túrleri boıynsha jalaqy tóleýde jumysshylardyń kásipteri arasynda jiktelý saqtalady. Basshylar sanatyna jatatyn qyzmetkerlerdiń ortasha jalaqysy biliktilik deńgeıi joǵarǵy mamandardyń jalaqysynan 1,9 ese, biliktilik deńgeıi orta mamandardyń jalaqysynan 2,3 ese jáne biliktiligi joq jumysshylar jalaqysynan 4,1 ese kóp.
Eń joǵarǵy jalaqy shıki munaıdy jáne tabıǵı gazdy óndirý salasynda jumyspen qamtylǵan uıymdardyń basshylarynda - 1 196,8 myń teńge tirkeldi. Bul kómir jáne lıgnıt óndirý salasyndaǵy basshylardyń ortasha alatyn jalaqysynan 2,7 ese jáne qurylys salasyndaǵylardan - 3,0 ese joǵary. Shıki munaıdy jáne tabıǵı gazdy óndirý salasyndaǵy biliktiligi joǵary mamandary alatyn joǵary jalaqy mólsheri 386 myń teńge, al áýe kóligi salasynyń biliktiligi orta mamandary 367 myń teńge aılyq alatynyn atap ótken jón.
Ekonomıkalyq qyzmet túrleri jáne qyzmetkerlerdiń kásipter bólinisinde eńbekaqy tóleýde aıtarlyqtaı aıyrmashylyq saqtalýda. Munaı óndirý ónerkásip kásiporyndarynda joǵary aqy tólenetin mamandar ınjener-tehnolog, tseh sheberi jáne ınjener-mehanık bolyp tabylady (245 - 271 myń teńge). Áýe kóligi salasyndaǵy qyzmetkerler 260 myń teńge, al qarjy jáne saqtandyrý qyzmeti salasyndaǵy qyzmetkerler 177 myń teńge jalaqy aldy.
Qurylys salasynda joǵary deńgeıli bilikti mamandar arasynan eń joǵary jalaqyny ekonomıstter (183 myń teńge), biliktilik deńgeıi bar mamandardan - qaptaýshy-mramorshylar (222 myń teńge) jáne ınjenerler (187 myń teńge) alady eken.
