Basshy óz qyzmetkerleriniń zańsyz áreketterin jasyrmaýy kerek - Toqaev
«Sybaılas jemqorlyq jóninde júıeli túrde eskertip otyrýǵa erekshe mán bergen jón. Osyǵan oraı, túrli saladaǵy jemqorlyqqa jol ashatyn jaǵdaılarǵa sapaly taldaý jasaý kerek. Zań barlyq memlekettik organdarǵa túıtkildi tustardy óz betinshe anyqtap, joıýǵa mindetteıdi. Alaıda, bul jumys júrip jatqan joq. Mundaı áreketsizdik jaqsylyqqa aparmaıdy. Der kezinde aldyn alý jáne eskertý jumysy júrgizilmese, jemqorlyq degen kesel kóptegen adamnyń jarqyn keleshegine balta shabýy ábden múmkin», - dedi Memleket basshysy.
QR Prezıdentiniń atap ótýinshe, jemqorlyqpen kúrestegi áreketsizdik azamattar tarapynan narazylyq kóńil-kúıi men quqyqtyq nıgılızmniń órshýine alyp keledi. Jemqorlyq deńgeıi barynsha joǵary óńirlerde ádette jappaı sıpattaǵy qylmystyq kórinisterdiń de oryn alý tosyn sáıkestik bolýy múmkin emes. Al búgingi baǵalaýlar belgili bir mınıstrliktegi anyqtalǵan paraqorlyq faktileri sanyna ǵana negizdelip otyr. Baǵalaý aldyn alý boıynsha qabyldanǵan sharalar, jemqorlyq táýekelderin tómendetý jáne memlekettik qyzmetterdi alý barysyndaǵykedergilerdi joıý negizinde qalyptasýy tıis.
«Basshy óz qyzmetkerleriniń zań buzýshylyǵyn jasyrmaýy kerek. Sondyqtan, ony tek jazaǵa tartýdan bólek, yntalandyrý da mańyzdy. Bul aldyn ala júıeli sharalar qabyldaýǵa aıtarlyqtaı septigin tıgizedi. Árbir ákim jáne mınıstr jumsalǵan qarajatqa ǵana emes, ony durys josparlaýǵa da jaýapty bolýǵa tıis. Naq osy tusta sybaılas jemqorlyqqa barý qateri kóp bolýy múmkin. Sondyqtan, ár basshyǵa jeke jaýapkershilik júkteledi. Bas prokýratýraǵa osyndaı baǵalaý júıesin ázirleýdi tapsyramyn», - dedi Qasym-Jomart Toqaev.