Basshysyn para berýge kóndirgen aqtóbeliktiń isi sotqa tústi
AQTÓBE. KAZINFORM – Jeke kompanııa basshysy qyzmetkerine aldanǵanyn túsingen kezde ony ustap berdi. Sottalýshy alǵashynda 100 mln, keıin 50 mln teńge para berýge kóndirgen. Aıyptaý aktisi búgin sotta oqyldy.
Aqtóbe oblystyq qylmystyq ister jónindegi mamandandyrylǵan aýdanaralyq sotynda jeke kompanııanyń qaýipsizdik qyzmeti jónindegi bastyǵyna qatysty is qaralyp jatyr. 41 jastaǵy aqtóbelikke Qylmystyq kodekstiń «Alaıaqtyq» jáne «Para berý» baptary boıynsha aıyp taǵyldy. Ol jumysqa 2024 jyly kirisedi.
Quqyq qorǵaý organdarynda tájirıbesi bar maman basshymen jaqyn aralasqan. Tipti basshysynyń burynǵy áıelimen arada bolǵan azamattyq, qylmystyq isteri sotta qaralǵan kezde janynda júredi. Al basshysy syıaqy taǵaıyndaýǵa ýáde etken. Sot aıaqtalǵan soń kelisim negizinde syıaqy da suraıdy. Alaıda qyzmettik páter men 2,5 mln teńge nesıe qaryzyn ótegenin aıtyp, kelisimnen bas tartady.
- Asa iri mólsherde aqsha ıemdenýge jáne laýazymdy tulǵalarǵa para berýge aıdap salýǵa baǵyttalǵan qylmystyq quqyqbuzýshylyq jasaý oıy týyndaıdy. QR UQK tarapynan jedel tergeý júrgizilip jatqany ári jaqyn ýaqytta qylmystyq is qozǵalatyny týraly kórineý jalǵan habarlama jiberýdi kózdeıdi. Quryltaıshylarǵa qarjylyq buzýshylyqtar anyqtalǵany týraly jalǵan hat daıyndaıdy. Ári osy hatta 2020-2025 jyldar aralyǵyn qamtıtyn qujattardy usynýdy suraıdy. Hatqa ózi oıdan shyǵarǵan aǵa tergeýshiniń aty-jónin jazady. Keıin tirkelmegen baılanys nómiri arqyly kompanııanyń zańgerine qońyraý shalyp, UQK atynan daıyndalǵan degen jalǵan hatty joldady. Zańger basshysyna jetkizip, kompanııa basshysy ózi senim artqan qaýipsizdik jónindegi basshyǵa aıtady. Keıin basshy jalǵan hatta kórsetilgen qujattardy alyp, UQK barady. Alaıda is qozǵalmaǵanyn, hatta kórsetilgen tergeýshiniń múlde joq ekenin bildi,- dedi memlekettik aıyptaýshy sotta.
Ári qaraı sottalýshy tanysyn osy iske aralastyryp, ony UQK qyzmetkeri dep tanystyrady. Kezdesýde 100 mln teńge mólsherinde para talap etip otyrǵanyn habarlaıdy. Ózi deldal bolatynyn aıtqan.
- Jábirlenýshi onyń talaptardyń zańsyz ekenin túsinip, UQK departamenine ózi aryz jazady. Jasyryn tergeý júrgizý kezinde jábirlenýshi para somasyn 50 mln teńgege deıin tómendetýdi surap, kelisken. 2026 jyldyń qańtar aıynda bótenniń múlkin asa iri mólsherde aldaý jáne senimge qııanat jasaý arqyly ıemdenýge oqtalý, sondaı-aq laýazymdy tulǵalarǵa para berýge aıdap salýǵa baǵyttalǵan qylmystyq nıetin sońyna deıin jetkizý maqsatynda 22 mln teńge, onyń ishinde 20 mln teńge mýlıaj, 2 mln teńge jábirlenýshige tıesili aqshany alady. Aqshany alǵannan keıin ony UQK departamentiniń qyzmetkerleri ustady. Tintý júrgizý barysynda aqsha qyzmettik kabınetten tabyldy, - dedi memlekettik aıyptaýshy.
Aıta keteıik, UQK kóliktegi polıtsııa qyzmetkeriniń ustalǵanyn rastady. Qyzmetkerdiń esirtki tasymalyna qatysy bolýy múmkin.
