Basshysy 92-de, eń jas qyzmetkeri 76-da - mınıstr Fesenkov ınstıtýtyndaǵy daýǵa pikir bildirdi

ASTANA. KAZINFORM – Ǵylym jáne joǵary bilim mınıstri Saıasat Nurbek Májilistegi baspasóz máslıhatynda Almatydaǵy V. G. Fesenkov atyndaǵy Astrofızıka ınstıtýtynyń Aı men planetalar fızıkasy zerthanasynyń aınalasyndaǵy daýǵa pikir bildirdi.

- V.G. Fesenkov atyndaǵy ınstıtýt negizi Tsıfrlyq damý mınıstrliginiń quzyretinde. Biraq ǵylym saıasatyn bizdiń mınıstrlik aıqyndaıtyn bolǵandyqtan mekeme mamandarymen sóılesip, ýájderin tyńdadyq. Birinshiden, zerthana jabylmaıdy. Sondaı aqparat taraǵan edi. Sol Fesenkov atyndaǵy ınstıtýt janynan 1974 jyly ashylǵan bir zerthana bar. Sol ınstıtýttyń basshysy bıyl 93-ke tolady. Eń jas degen ǵylymı qyzmetker 76 jasta, - dedi ol.

Mınıstrdiń sózinshe, atalǵan zerthana sońǵy 20 jylda bir de bir úlken jobaǵa qatyspaǵan.

- Granttyq jobalarǵa úsh ret qujat tapsyryp, óte almaǵan. 2018 jyldan beri bir de bir ǵylymı basylymǵa maqala shyǵarmaǵan. Bizdiń de nysanalyq baǵdarlamalarǵa qatyspaǵan. Sondyqtan durys túsinýlerińizdi ótinemiz. Ásirese ǵylym salasynda jastarǵa da jol berýimiz kerek. Qazir eldegi ǵalymdardyń ishindegi jastardyń úlesi 46 paıyzǵa jetip otyr, - dedi vedomstvo basshysy.

Eske salsaq, ótken aptada Almatyda birneshe ǵylymı qyzmetkerdiń jumystan ádiletsiz shyǵarylǵany týraly aqparat taraǵan bolatyn.