Basshylyq baqylaýynda: Almaty polıtsııasy Aqnar ólimine baılanysty tergeý júrgizip jatyr

ALMATY. KAZINFORM — Almaty polıtsııasy byltyr qaıtys bolǵan jas qyzdyń ólimine baılanysty qylmystyq is qozǵady.

2024 jyldyń shilde aıynda Almatydaǵy kóp qabatty úılerdiń birinde 7-qabattan qulap Aqnar Gúlstan mert boldy. Marqumnyń anasy qyzynyń bıikten ózdiginen sekirip ketpegenin, ol kisi qolynan qaıtys bolǵanyn aıtyp birneshe ret málimdeme jasady. Bul oqıǵany qazaqstandyqtar bıyl áleýmettik jelide qyzý talqylaı bastady.

Búgin Almaty qalasynyń polıtsııa departamenti jumbaq jaǵdaıda qaıtys bolǵan qyzdyń ólimine baılanysty jan-jaqty tergeý júrip jatqanyn habarlady.

— Qalalyq polıtsııa departamentiniń tergeý basqarmasy ótken jyldyń shilde aıynda Almaty turǵynynyń ólimi deregi boıynsha qylmystyq is qozǵady. Qazirgi ýaqytta bolǵan oqıǵanyń tolyq kórinisin anyqtaý úshin jan-jaqty tergeý júrip jatyr. Tergeý sheńberinde materıaldar jınaqtalyp, taldanýda, kýálardan jaýap alynýda, beınejazbalar zerdelenýde, zańda kózdelgen basqa da protsessýaldyq áreketter júzege asyrylyp jatyr, — dep málimdedi departamentten.

Sonymen qatar polıtsııa málimetinshe, tergeý barysy departament basshylyǵynyń erekshe baqylaýynda.

— Biz marqumnyń týystarynyń bastan keshken qaıǵysyna shyn júrekten ortaqtasamyz. Sonymen qatar sońǵy protsessýaldyq sheshim barlyq taǵaıyndalǵan saraptamalardyń nátıjelerin alǵannan keıin jáne qajetti tergeý áreketterin júrgizgennen keıin qabyldanatyn bolady, — delingen polıtsııa málimdemesinde.

Eske salaıyq, byltyr 4 qazan kúni Talǵar qalasyndaǵy tóbelesten 16 jastaǵy Sherzat Polat qaıtys boldy.

Ashýly talǵarlyqtar jasóspirim ólimine baılanysty narazylyqqa shyqty. Odan keıin Almaty oblysynyń prokýratýrasy kisi óltirý týraly bul is erekshe baqylaýǵa alynǵanyn habarlady.