Baspasóz mazmun emes, taqyryp berýmen aınalysyp ketti - Aqparat komıteti

ASTANA. QazAqparat - Qazaqstandyq baspasóz mazmun emes, taqyryp berýmen aınalysyp ketti. Bul týraly búgin Astana Media Week aıasynda ótip jatqan «Óńirlik BAQ» forýmynda QR Aqparat jáne kommýnıkatsııalar mınıstrligi Aqparat komıtetiniń tóraǵasy Erjan Núkejanov aıtty, dep habarlaıdy QazAqparat tilshisi.

«Adamdar ınternetke kirgende 8 sekýndtyń ishinde aqparat ala almasa, onda shyǵyp ketedi. Qazirgi kezde bul ýaqyt odan da keıin shegerilýde. Sońǵy zertteýlerge qarasaq, 3 sekýnd qana qaraıdy eken de, shyǵyp ketedi. Osyǵan tán qubylys shyǵar. Jalpy, bizdiń biraz baspasóz mazmun emes, kóbinese taqyryp berýmen aınalysyp ketti. ıAǵnı, úlken taqyryp beredi. Taqyryp adamdy baýrap alsa, onda ol oqıdy, qaraıdy. Taqyryp baýramasa onyń ishinde qyzyqty dúnıeler bolsa da, attap ketedi. Sol sebepti taqyryp qoıýdy da úırenýimiz kerek shyǵar. Ol da úlken másele ári jýrnalıstik kásibılikke baılanysty. Muny ońaı retteýge bolady dep oılaımyn», - dedi komıtet basshysy.

Sonymen qatar ol Qazaqstanda  ǵana emes jalpy álemdik gazet-jýrnaldar óz strategııalaryn ózgertip jatqanyn eske saldy.

«Mysaly, jahandyq kólemde alyp qaraıtyn bolsaq, Ulybrıtanııada aımaqtyq jáne jergilikti gazetterdiń sany 2005-2018 jyldardyń aralyǵynda 200-ge deıin tómendegen. ıAǵnı gazetter jabylyp jatyr jáne bul zańdy qubylys. Odan qorqýdyń da, úrkýdiń de qajeti joq. Jumys isteı berý kerek. AQSh-ty alyp qarasaq, onda da sondaı kórsetkish. Kúndelikti baspasóz taralymy  1994 jylǵy 60 mıllıonnan 35 mıllıonǵa deıin tómendep otyr», - dedi ol.

Erjan Núkejanovtyń aıtýynsha, gazet-jýrnal taralymynyń azaıýy jarnama naryǵyna da áserin tıgizgen. Máselen, 2000 jyldary álemdik deńgeıde baspasózdegi jarnama naryǵy 65 mlrd dollar bolsa, qyzirgi ýaqytta 14 mlrd dollarǵa deıin tómendegen.

«ıAǵnı jarnama sandyq tehnologııalarǵa ketip jatyr. Degenmen munan shyǵý joldary da qarastyrylǵan. «Vashıngton post», «Nıý-Iork Taıms» gazetterin alyp qaraıtyn bolsaq,  olarda tsıfrlyq jarnama 2016 jyldan beri ósim kórsetýde», - dedi komıtet basshysy.

Osy oraıda ol «Egemen Qazaqstan», «Kazahstanskaıa pravda», «Jas Alash» syndy otandyq basylymdar jarnama naryǵyndaǵy tyǵyryqtan shyǵý joldaryn qarastyryp, naqty nátıjelerge de qol jetkize bastaǵandyǵyn aıtty.

«Egemen Qazaqstan» gazeti tóte jazý, latyn álipbıine kóshý arqyly Qazaqstanda ǵana emes, sonymen qatar Iran, Qytaı, Ózbekstan, Qyrǵyzstan elderinde de óz oqyrmandaryn taýyp otyr jáne onyń paıyzy jyldan-jylǵa artyp keledi. Bul bizdiń baspasóz úshin úlken múmkindik dep bilemin», - dedi Erjan Núkejanov.