Baspasóz máslıhaty: Birinshi jartyjyldyqta syrtqy saýda aınalymy 61 mlrd. 559 mln. AQSh dollaryn qurady
TANA. 15 tamyz. QazAqparat /Gúlmıra Alıakparova/ - 2011 jyldyń qańtar-maýsymynda Qazaqstannyń syrtqy saýda aınalymy 61 mlrd. 559 mln. AQSh dollaryn qurap, ótken jyldyń tıisti kezeńimen salystyrǵanda 44,7 paıyzǵa ósti.
QR Statıstıka agenttiginiń tóraǵasy Álıhan Smaıylovtyń aıtýynsha, sonyń ishinde eksport - 44 mlrd. 916 mln. AQSh dollaryn (ósim - 51,8 paıyz), ımport - 16 mlrd. 642 mln. AQSh dollaryn (28,4 paıyz) quraıdy.
«Eksport jáne ımport baǵalaryn qaraıtyn bolsaq, bıylǵy jyldyń 6 aıynda eksporttyń baǵalary 41 paıyzǵa, al ımporttiki - 5,7 paıyzǵa ósti. Eksport kóleminiń ımportqa qaraǵanda oza ósýi sondaı-aq, ımport baǵalarymen salystyrǵanda, eksport ónimderi baǵalarynyń eleýli artýy Qazaqstan úshin syrtqy saýda konıýktýrasynyń jaqsarǵandyǵyn bildiredi. Bul eldiń tólemdik balansyn aıtarlyqtaı jaqsartady», - dedi ol.
Sondaı-aq, tóraǵa usynǵan málimetterge súıensek, tutyný baǵalarynyń ındeksi 2010 jyldyń shildesinde 2010 jyldyń jeltoqsanymen salystyrǵanda 105,6 paıyzdy qurady. Azyq-túlik taýarlarynyń baǵalary - 8,2 paıyzǵa, azyq-túlik emes taýarlar - 3,1, aqyly qyzmetter - 4,9 paıyzǵa artty. Atalmysh kezeńde ónerkásip ónimin óndirýshi kásiporyndarda baǵalar 21 paıyzǵa qymbattady.
