Baspasóz hatshylaryna arnalǵan ádistemelik kitaptar daıyndalyp jatyr – mınıstr

ASTANA. QazAqparat – Elordada memlekettik qyzmetshilerdiń qoǵammen baılanysyn jaqsartý maqsatynda «Kópshilik aldynda sóıleý. BAQ-pen ózara árekettesý» taqyrybyndaǵy úsh kúndik semınar bastaldy. Іs-sharanyń alǵashqy kúni Memlekettik qyzmet isteri agenttiginiń bastamasymen, Aqparat jáne qoǵamdyq damý mınıstrliginiń qoldaýymen QR Prezıdenti janyndaǵy Memlekettik basqarý akademııasynda ótti, dep habarlaıdy QazAqparat tilshisi.

Jobanyń negizgi maqsaty – halyqpen tıimdi keri baılanys ornatatyn, memlekettik saıasat pen memlekettik organnyń jumysyna qatysty aqparatty jetkizetin salalyq spıkerler pýlyn qurý.

«Bizdiń aldymyzda Memleket basshysy qoıǵan mindetterdi tolyqqandy júzege asyrý jáne halyqqa shynaıy, adal, ashyq qyzmet kórsetetin, bıýrokratııaǵa jol bermeıtin servıstik jáne adamǵa baǵdarlanǵan memlekettik apparat qalyptastyrý maqsaty tur. Ashyqtyq prıntsıpine negizdelgen jańa basqarý mádenıetine sáıkes, halyqqa aǵymdaǵy jáne josparlanyp otyrǵan ózgeristerdi, memlekettik organnyń jumysyna qatysty aqparatty jan-jaqty jetkizip, túsindire alatyn salalyq spıkerlerdi daıyndaý mańyzdy», – dedi Memlekettik qyzmet isteri agenttiginiń tóraǵasy Darhan Jazyqbaev.

QR Aqparat jáne qoǵamdyq damý mınıstri Darhan Qydyráli memlekettik organdardyń baspasóz hatshysy daǵdarys jaǵdaıynda aqparatty aldymen qazaq tilinde jetkizýi asa mańyzdy ekenin atap ótti.

«Qazirgideı aqparat jyldam taraıtyn zamanda kommýnıkatsııanyń mańyzy óte zor. «Halyq únine qulaq asatyn memleket» tujyrymdamasyn júrgizý úshin kez kelgen memlekettik qurylym ashyq, shynaıy bolýy kerek. Mekemege qatysty kez kelgen suraqqa jaýap beretin ókildi nemese baspasóz hatshysyn daıarlaý mańyzdy. Daǵdarys týyndaǵan jaǵdaıda aqparat aldymen qazaq tilinde jazylyp, taratylýy kerek. Bul jaǵdaıda salaǵa jaýapty memlekettik qyzmetkerdiń kommýnıkatıvtik daǵdylary damyǵan jáne qazaq tilin jetik meńgergen bolýy tıis. Qazirgi tańda baspasóz hatshylarynyń biliktiligin arttyrýǵa baǵyttalǵan ádistemelik kitaptardy daıyndap, shyǵaryp jatyrmyz. Aqparat jáne qoǵamdyq damý mınıstrligi tıisti qurylymdarǵa, memlekettik qyzmetshilerge qoldaý kórsetýge daıyn», – dedi Darhan Qydyráli.

Semınarǵa ortalyq jáne jergilikti memlekettik organdardan kelgen 40-tan astam maman qatysyp jatyr. Sharanyń ashylý saltanatyna respýblıkalyq «Qazaqstan» teleradıokorporatsııasy AQ tóraǵasynyń orynbasary Erkin Muhamedjanov, QR Prezıdentiniń janyndaǵy Memlekettik basqarý akademııasynyń rektory Erlan Ábil qatysty.