Baspanasy tasqyn sýda qıraǵan aqtóbelikter páterli boldy
AQTÓBE. QazAqparat - Aqtóbedegi sý tasqyny kezinde baspanasy qırap qalǵan bes otbasyǵa páter berildi. Sonymen qatar taǵy 8 otbasy berilgen jer telimine úı salyp alǵansha ýaqytsha baspanada tura alady, dep habarlaıdy QazAqparat tilshisi.
Sý tasqyny kezinde Aqtóbe qalasyndaǵy 771 úı zardap shekti. Barlyǵy 3 myńǵa jýyq adam bir aptada úısiz qalyp, ýaqytsha mektepterdi panalady. Keıin bári páterlerge shyǵaryldy. Qazir barlyq adam páter jaldap, týǵan-týystarynyń úıin panalap júr. Al búgin bes otbasy «Nur-Aqtóbe» yqsham aýdanynan páter aldy.
«Mahambetovka aýylyndaǵy úıim ortasyna tústi. Jańa páter «Nur-Aqtóbe» aýdanynda. Úsh jyl turamyn, keıin nesıege satyp alamyn. Kúıeýim jeke kompanııada jumys isteıdi. Ózim jumyssyzbyn. Eki balam stýdent, bireýi oqýshy. Taǵy bireýi óz otbasyn quryp ketti. Qujattarym túgel. Páter alý úshin «Turǵyn úı qurylys jınaq bankinen» esepshot ashyp, sol jerge 300 myń saýymyz kerek dedi. Úıge as úı jıhazy men dıvandy alyp berdi», - deıdi Nurgúl Baqytova.
Páter ıelerine kiltti oblys ákimi Berdibek Saparbaev tabys etti. Ol sý tasqyny kezinde baspanasy qulap qalǵan adamdardyń barlyǵyna kómek kórsetiletinin jetkizdi. 
«Birden úı salý múmkin emes. Biz daıyn turǵan úıden berip jatyrmyz. Keı adamdarǵa jer berip, qurylys materıaldarymen kómektesemiz. Alǵashqy bes páter baspanasy qırap qalǵan, áleýmettik jaǵdaıy tómen otbasyǵa berildi. «Qolqanat Aqtóbe» qory qurylyp, tek Aqtóbeden emes, ózge óńirlerden qarjy aýdardy. Páter alǵandarǵa esepshot ashyp, 300-500 myń teńgeden aqsha salamyz. Sonymen qatar, 8 otbasyǵa ýaqytsha páter berildi. Olar jer telimine úı salyp alǵansha sol páterde turady. Jer berý ońaı, oǵan sý, jaryq, gazyn jetkizip berý qıyn. Jerlerdi qarap jatyrmyz. Kún jylydy, úı salýǵa múmkindik bar»,- dedi oblys ákimi Berdibek Saparbaev.
Aıta keteıik, sý tasqyny kezinde zardap shekkenderge áleýmettik qoldaý kórsetý úshin óńirde «Qolǵanat Aqtóbe» qory quryldy. Qorǵa 102 mıllıon teńgege jýyq qarjy tústi. Qarjynyń 10 mıllıon teńgesin ekinshi deńgeıli bank, 52 mıllıon teńgesin mańǵystaýlyq munaıshylar bóldi.
