Baspanasy sýǵa ketken aqtóbelikter komıssııaǵa rezeńke etikter daıyndap qoıdy
AQTÓBE. QazAqparat - Aqtóbelikter baspanasy sýǵa ketken kezde úılerine kirmeı, syrttan ketken komıssııa múshelerine renishti. Olar arnaıy rezeńke etik daıyndap, baqylaýǵa kelgen adamdardyń jaǵdaıyn jasap qoıǵan, dep habarlaıdy QazAqparat tilshisi.
Sý tasqyny kezinde jalǵyz baspanasynan aıyrylǵan aqtóbelikter arnaıy beketterge ornalastyrylyp, jatyn orynmen, tamaqpen, kıimmen qamtamasyz etildi. Biraq el kóńili alań. Olar kúndiz úılerin qaraý úshin baý-baqshany jaǵalaıdy. Bári rezeńke etik satyp alǵan. Sebebi, sý basyp, balshyqqa aınalǵan jerge kirý múmkin emes.
«Bizge saıajaı dep qyryn qaraıdy. Biraq bárimizde jer týraly akti, qujattarymyz bar. Únemi shettetedi. Kóship kelgen kezde jaryǵyn, gazyn júrgizip aldyq. Al bıyl jalǵyz baspanamyz sýǵa ketti. Kómek kerek bizge»,- dedi Mahambetovka aýylynyń turǵyny Gúlbarshyn Qamysbaeva.
Qazir baspanasyn sý basqan adamdar qaladaǵy jaldamaly páterdiń, bazardaǵy rezeńke etiktiń baǵasy qymbattap ketti dep shaǵym aıtyp jatyr.
«Úıimizdegi zattardyń jaǵdaıyn bile almaı, kúnderimiz uıqysyz ótip jatyr. Jyǵylǵannyń ústine judyryq demekshi, bazardaǵy rezeńke etikter de qymbattady. Buryn 5 myń teńge edi, qazir baǵasy 10 myńǵa kóterildi. Ne degen masqara?»,- dedi Aıdyn Úsenbaeva.
Eske salsaq, búgin Aqtóbe oblysynyń ákimi Berdibek Saparbaev qaladaǵy sý basqan jerlerdi qarap, úılerdiń jaǵdaıymen tanysty . Keıin baspanasyn sý basqan qarapaıym halyqpen kezdesý úshin mektepterge baryp, jaǵdaılaryn bildi. 
