Baspanasy sýda qalǵan eki aqtóbelikke kásipker páter syılady
Búgin taǵy eki aqtóbelik páter alyp, baspana máselesi túbegeıli sheshimin tapty. «Nektar» qurylys kompanııasynyń dırektory Shamıl Kaspranov eki jumysshysyna eki bólmeli páter syılady. Aýmaǵy 90 sharshy metr bolatyn páterdi sý tasqyny kezinde úısiz qalǵan qarapaıym jumysshylar aldy.
«Kez kelgen adam qolynda bar kómekti berýi kerek. Sý tasqyny kezinde eki jumysshy kelip, «úıimizdi sý basty, tek shatyry qaldy» dedi. Sol kúni ekeýine de páter berip, olar osy kúnge deıin sol jerde turyp keldi»,- dedi kásipker Shamıl Kaspranov.
Qurylys kompanııasyndaǵy betonshylardyń brıgadıri Senbi Jıenbaev pen santehnık Jolmurat Jańabaev búgin saltanatty túrde páter kiltin aldy. J.Jańabaev Aqtóbe qalasyndaǵy «Qısyq kól» saıajaı aýmaǵyna eki bólmeli shaǵyn úı salǵan. Arada 10 jyl ótse de qurylys jumysy bitpegen eken.
«Aqtóbege Yrǵyz aýdanynan kóship keldim. Saıajaıdy satyp alyp, sol jerge úı salyp jatyr edik. Biraq jaryǵy bar, gazy joq. Kógildir otyn qubyryn kirgizýge qarjy bolmady. Úsh balam bar. Al keshegi sý tasqyny kezinde baspanamyz sýda qalyp, basshydan kómek suradyq. Ol birden páter kiltin berdi. Shamıl Kaspranovqa alǵysymyz sheksiz»,- dedi Jolmurat Jańabaev.
Eki jumysshyǵa Batys-2 aýdanyndaǵy «Nektar» turǵyn úı kesheninen eki bólmeli páter berildi. Sonymen qatar, kásipker Shamıl Kaspranov baspanasy sýda qalǵan jumysshylarynyń keıbirine úı salý kezinde kómek kórsetedi. Aıta keteıik, Aqtóbedegi sý tasqyny kezinde 81 úı qırap qaldy. Qalalyq ákimdik 66 adamǵa jer telimin berip, úı salý úshin 1 mıllıon teńgeden bóldi. 