Baspanasy sýda qalǵan aqtóbelikterdi mektepten bir túnde shyǵaryp jiberdi
AQTÓBE. QazAqparat - Aqtóbedegi sý tasqyny kezinde 700-ge jýyq úı sýda qalyp, 800-den astam adam mektepterdi panalaǵan bolatyn. Olarǵa páter joldaýǵa 30 myń teńgeden berip, bárin bir túnde mektepten shyǵaryp jiberdi, dep habarlaıdy QazAqparat tilshisi.
Aqtóbe qalasynda Elek, Jińishke, Qarǵaly, Jaman Qarǵaly ózenderi arnasynan asyp, ózen boıyn jaǵalaı ornalasqan saıajaıdaǵy úılerdi sý basqan bolatyn. Saıajaılardyń bárinde qarapaıym halyq turady. Olar úıin sý shaıyp ketken kúni jalǵyz baspanasyndaǵy qujattardy alyp, syrtqa shyqty. Sodan beri mektepterdegi ýaqytsha beketterge ornalastyryldy. Komıssııa shyǵyndy esepteýge kirisip, úısiz qalǵan adamdar mektepterden shyǵaryldy. Qazir qaladaǵy 9 bekette, ıaǵnı, mektepterde eshkim qalǵan joq.
«Senbi kúni túngi saǵat 11-00-den keıin kelip, shyǵyńdar dedi. Tún ortasynda qaıda baramyz degenge eshkim qulaq aspady. Bir otbasyǵa 30 myń teńge berip jatyr degen soń №40 orta mektepke bardyq. Bizdiń eki úıimiz, bir saraıymyz sýda qaldy. Ol jerde 5 otbasy turady. Bárimizge bergeni 30 myń teńge. Páter jaldady, 7 adam syıdy. Biz 17 adambyz. Al meniń balam aýrýhanada. Búgin shyǵady. Olardy qaıda aparamyn? Úı syz, bir mınýt turaqtaý múmkin emes»,- dedi Muratbek Qyrqynbaev.
Onyń kelinshegi Gúlnazym Joldasova 7 aılyq balasymen aýrýhanadan erteń shyǵatynyn, qaıda baryp, kimnen pana suraryn bilmeı otyrǵanyn aıtyp, kómek surady.
Al Ózbekstannan Aqtóbege qonys aýdarǵan 4 balaly otbasy qazir jataqhanada otyr.
«Túnde kelip, shyǵyńdar degen kezde bizdiń barar jerimiz bolmady. Aıqaı-shýmen jataqhananyń bir bólmesine qol jetkizdik. Sýǵa ketken úıge bardyq. Qolqany syzdyń ıisi qabady. Ot jaqqanda ótkir ıis kúsheıedi. Bizge de 30 myń teńge berdi»,- dedi Saodathan Myrzabaeva.
Búgin qalalyq ákimdiktiń áleýmettik komıssııasy osy oqıǵaǵa qatysty túsinikteme berdi. Mektepte balasy oqıtyn ata-analardyń shaǵymy men oblystyq tutynýshylardyń quqyqtaryn qorǵaý departamentiniń sheshimimen mektepterdegi ýaqytsha beketter jabyldy. Keıin zararsyzdandyryldy.
«Ata-analardyń ótinishimen, oblystyq tutynýshylardyń quqyqtaryn qorǵaý departamentiniń sheshimimen ýaqytsha qonystanǵandar mektepterden shyǵaryldy. Biz senbi kúni №40, 26 mektepterge bardyq. Kóbi osy eki bilim ordasyna ornalastyrylǵan bolatyn. Mektepti bosatý úshin olarǵa materıaldyq kómek berýimiz kerek boldy. Biz «Qolǵanat Aqtóbe» qorynan aqsha ala almadyq. Sóıtip, kásipkerden 3 mıllıon 300 myń teńge qaryzǵa aqsha alyp, sol kúni 110 otbasyǵa 30 myń teńgeden berildi. Olardyń kóbi kópbalaly. Otbasynda 17 adamy bar jaǵdaı kezikti. Sonda da olardan qolhat alyp, bárine birdeı 30 myń teńge berildi. Endi sol aqshany búgin qaıtarýymyz kerek. Qoǵamdyq qorǵa jaýapty komıssııa músheleri búgin osy sheshimge kelisim berýi kerek»,- dedi qala ákiminiń orynbasary Rýzııa Aıdasheva.
Aıta keteıik, qalalyq ákimdik mektepterdegi otbasylardy páterlerge qonystandyrý úshin túngi saǵat 1:00-ge deıin júrgen.
