Baspanasy sý astynda qalǵan maqtaaraldyqtar úshin 400-ge jýyq úı salynyp jatyr
MAQTAARAL. QazAqparat - Búgin Maqtaaral aýdanynda áleýmettik máseleler jónindegi jumysshy toptyń otyrysy ótti, dep habarlaıdy QazAqparat óńirlik kommýnıkatsııa qyzmetine silteme jasap.
Jıynǵa Túrkistan oblystyq Qazaqstan halqy Assambleıasy hatshylyǵynyń meńgerýshisi, Maqtaaral aýdanyndaǵy oblystyq shtabtyń áleýmettik máseleler jónindegi jetekshisi Ǵanı Rysbekov, «Nur Otan» partııasy Túrkistan oblystyq fılıaly tóraǵasynyń birinshi orynbasary Beısen Tájibaev, aýdandyq partııa ókilderi, sý tasqynynan zardap shekken aýyl okrýgteriniń ákimderi, quqyq qorǵaý organdary men aýdandyq ákimdiktiń ıdeologııa bóliminiń basshylary men mamandary qatysty.
Otyrys barysynda sóz alǵan oblystyq shtabtyń áleýmettik máseleler jónindegi jetekshisi Ǵanı Rysbekov sý tasqynynan zardap shekken turǵyndardyń ótemaqylaryn tezdetip tóleý, búgingi jaı-kúıin jaqsartý, turǵyn úı salý kezindegi qıyndyqtaryn eńserý, Órgebas, Fırdaýsı aýyldaryndaǵy qalypqa keltirý jumystaryna qoldaý bildirý jónindegi jumystardy shıratý qajettigine toqtaldy.
«Nur Otan» partııasy Túrkistan oblystyq fılıaly tóraǵasynyń birinshi orynbasary Beısen Tájibaev sý tasqynynan zardap shekken turǵyndardyń ótemaqysyn tóleý jumysyna bilikti mamandardy tartyp, halyqpen tyǵyz baılanys ornatý, túsindirý sharalaryn uıymdastyrý kerektigin atap ótti.
Munan soń arnaıy top Myrzakent mańynda boı kóterip jatqan jańa móltek aýdandaǵy qurylys jumystarymen tanysty.
Aıta keteıik, búginde munda 383 úıdiń qurylys júrip jatyr. Onyń 193-i - úkimettiń rezerv qarjysyna, 190-y - qorlar esebinen boı kóterip jatyr. Sonyń ishindegi 20 úı «Nur Otan» partııasynyń «Biz birgemiz» qorynyń qoldaýymen salynýda.
«Nur Otan» partııasy Túrkistan oblystyq fılıaly tóraǵasynyń birinshi orynbasary Beısen Tájibaev sondaǵy qurylysshylarmen tildesip, olardyń búgingi jaı-kúıimen tanysty.
Qazirgi tańda jańa móltekaýdanda 188 úıdiń irgetasy quıylyp, 73-inde qabyrǵa kóterý jumystary júrip jatyr. Taǵy eki úıdiń shatyry jabylýda.
Qurylys jumystary eki kezeńde júrgizilip jatyr. Úı salýǵa qajetti tehnıka men qurylys materıaldarynan tapshylyq joq.
