Baspanasy qıraǵan saıajaı ıeleriniń ótemaqysy durys baǵalanýy qajet – depýtat
ASTANA. KAZINFORM – Búgin Májilistiń jalpy otyrysynda depýtat Nartaı Sársenǵalıev sý tasqyny kezindegi Úkimettiń mańyzdy qaýlylaryn qazirgi tótenshe jaǵdaıǵa sáıkes ózgertý kerek ekenin usyndy.
«Búgingi depýtattyq saýalym qarǵyn sý qara shańyraǵyn aǵyzyp áketken aǵaıynnyń aryzy. Qyzyl sý arnasynan adasyp aqqanda, qylarǵa amal tappaǵan adamdar topan sýdyń beti qaıtqanda dalada qańǵyryp qalamyz ba dep qorqyp júr. Alpys kún tasyǵan sý, alty kúnde qaıtqanmen, qııametin qaıtaryp áketpeıdi dep 2 apta buryn dál osy minberden aıtqanym da sol edi. Jaıyq ózeni aǵyp ótetin Batys Qazaqstan oblysyndaǵy aǵaıynnyń ahýaly qazir arqamdy aıazdaı qaryp barady. Sát saıyn san qubylǵan sandarǵa nazar salsaq, Batys Qazaqstan oblysynda sý tasqynynan 1 292 turǵyn úıge zaqym kelgen. Sonyń 116-sy – Qaratóbe, 243-i – Syrym, 218-i – Bórli, 649-y – Terekti, 43-i – Báıterek, altaýy Tasqala aýdanynda, al 17 úı Oral qalasynda ornalasqan. Sý astynda qalǵan úıdiń syz tartatyny, qabyrǵasy kógerip kópshilikti kúrkildegen jótelge dýshar qylatyny saraptamasyz-aq sanaly adam túsinetin dúnıe», - dedi N. Sársenǵalıev Úkimet basshysy Oljas Bektenovtiń atyna joldaǵan saýalynda.
Onyń aıtýynsha, Batys Qazaqstan oblysyndaǵy taǵy bir kúrdeli ahýal saıajaı máselesine qatysty. Derkól, Shaǵan jáne Jaıyq ózenderindegi sý deńgeıiniń kóterilýi saldarynan 14 839 saıajaı ýchaskesin sý basqan. Onyń 14 466-sy – Oral qalasynda, 112-si – Báıterek, 245-i – Bórli, 16-sy Terekti aýdandarynda ornalasqan. Ol jaqta myńdaǵan adam turady.
«Saıajaı degeniń qazaq úshin demalys kúnderin ótkizetin emes, turaqty turatyn orynǵa aınalǵaly qashan. Sonyń ótemaqysyna qatysty túsinispestik áli toqtamaı tur. Óıtkeni, aǵyndy sýdyń astynda qalǵan saıajaı ıesine qansha aqsha beriledi nemese qashan, qaı jerden basqa úı usynylady? Bul derekter ázirge ortalyqtandyrylmaǵan. Aqparat jurtqa jedel jetýi shart. Tasqyn sý tosynnan kelgende tosyp úlgermegen myńdaǵan qandas qazir BQO-da seń soqqan balyqtaı eseńgirep qaldy. Olardyń ákimdikke baryp, janaıqaıyn jetkizgenin dúıim jurt kórdi. Sondyqtan onsyz da qarǵyn sýdyń saldarynan qara shańyraqsyz qalǵan azamattardyń zańdy talaptaryn ýaqytyly oryndaýymyz qajet», - dedi depýtat.
Onyń paıymynsha, sý astynda qalǵan baspana men saıajaılardy baǵalaýy tıis komıssııa jumysyn bir izge keltirý kerek. Sol úshin ár aımaqtaǵy komıssııanyń ár úı boıynsha qorytyndysy, negizdemesi, foto-vıdeo dáleldemeleri naqty bir jerge jınaqtalýy tıis.
«Baspanasy qıraǵan saıajaı ıeleriniń ótemaqysy ádiletti baǵalanýy qajet. Ár úıdiń, saıajaıdyń, tehnıka men tórt túliktiń ótemaqysy qashan tólenetini ár qorytyndynyń ishine júktelsin. Ol aqparattarmen barlyq azamattyń tanysý múmkindigi bolýy shart. Sý astynda qalǵan myńdaǵan saıajaıdyń aýlasynda las qaldyqtarǵa arnalǵan shuńqyrlar boldy, demek ondaǵy qaldyqtar sýǵa betine shyqty. Sondyqtan ol aýmaqtarǵa dereý sanıtarlyq-profıktıkalyq sharalar júrgizý qajet. Eń negizgisi, Úkimettiń mańyzdy qaýlylaryn búgingi tótenshe jaǵdaıǵa sáıkes ózgertý kerek. Olardyń osyndaı tótenshe jaǵdaıdaǵy úı berý, qaýipsizdikti qamtamasyz etý men ótemaqy tóleý tetikterin qaıta qaraý kerek», - dedi Nartaı Sársenǵalıev.