Baspanany jalǵa alǵan jas otbasy aıyna qansha aqsha tóleıdi

NUR-SULTAN. QazAqparat - Jastarǵa beriletin jaldamaly páter úshin otbasy aıyna 12 myń teńge tólep turatyn bolady. Bul týraly búgin Úkimet úıindegi baspasóz máslıhatynda QR Aqparat jáne qoǵamdyq damý vıtse-mınıstri Juldyz Omarbekova aıtty, dep habarlaıdy QazAqparat tilshisi.

«Jas adamnyń ómirlik kezeńi bar. Ol bilim alady, jumysqa turady jáne sodan keıingi másele - onyń shańyraq kóterýi. Bizde ajyrasý deńgeıi joǵary bolyp tur. Baspana otbasyndaǵy negizgi problema bolmasa da, solardyń biri ekendigi túsinikti. Bıyl jaldamaly páterler baǵdarlamasyn iske qostyq. Nur-Sultan, Almaty jáne Shymkent qalalarynyń árqaısysynda 1 myńnan páter beriledi. Oǵan satyp alý quqyǵy berilmeıdi. Jas otbasy aıaǵynan turyp ketkenshe múmkindik jasalady. Bizde «7-20-25», Turǵynúıqurylysjınaqbanki, «Báıterek» jelileri boıynsha memlekettik baǵdarlamalar bar. Biraq, olardyń barlyǵynda da baspana alý úshin bastapqy qarajat jınaý qajet. Al tapqan tabysyńnyń bári páter jaldaýǵa ketse, qalaı qarajat jınaı alasyń?», - dedi Juldyz Omarbekova.

Osy oraıda vıtse-mınıstr jastarǵa jaldamaly páter berýge arnalǵan baǵdarlamany teńdesi joq aktsııa dep sanaıtynyn aıtty.

«Qyrkúıekte qujat jınaý bastalady. Baspana alý erejesi bizdiń saıtymyzda 1 tamyzda jarııa etiledi. Bul - eń aldymen 29 jasqa deıingi azamattarǵa beriletin múmkindik. Eger onyń otbasy bolsa nemese qaraýynda múgedek ata-anasy ne múgedek balasy bolsa, onda qosymsha bonýs beriledi. Jaldamaly páter 3-ten 5 jylǵa deıingi merzimge arnalǵan. Qazirgi ýaqytta jergilikti atqarýshy organdarmen jáne basqa da mınıstrliktermen sharttar jasalyp jatyr», - dedi ol.

Sonymen qatar ol jastar jalǵa alǵan páterge aı saıyn tóleıtin boljamdy somany atady.

«Siz jaldamaly páterge aıyna shamamen 10-12 myń teńge tóleısiz. Bul - aqsha jınaýyńyzǵa múmkindik beretin soma. Páter alý úshin eń mańyzdy shart - Turǵynúıqurylysjınaqbankinen esepshot ashý, memlekettik baǵdarlamaǵa qatysý. ıAǵnı, biz baspana satyp alǵyńyz keletinin, qarjy jınap jatqanyńyzdy kórýimiz kerek. Baǵdarlama ómirdi endi bastaǵan jas otbasylar men jastardy qoldaýǵa arnalǵan. 3-5 jyldyń ishinde ıpoteka alý úshin eń tómengi jarnany jınaýǵa bolady. Odan keıin ol otbasylyq nemese eńbek jolyn jańa bastaǵan, kómekke muqtaj kelesi jastarǵa páterdi bosatyp berýi tıis», - dedi vıtse-mınıstr.