Baspanany nesıege alǵandardyń 60 paıyzy aı saıyn 100 myń teńgege deıin tóleıdi

ASTANA. QazAqparat - «7-20-25» baǵdarlamasy boıynsha baspanany qaryzǵa alǵandardyń 60 paıyzy aı saıyn 100 myń teńgege deıin tóleıdi. Bul týraly Parlament Senatynda áleýmettik turǵyn úı satyp alý múmkindikterin keńeıtýge arnalǵan dóńgelek ústelde «Baspana» ıpotekalyq uıymy» AQ basqarma tóraǵasy Qaırat Altynbekov málim etti, dep habarlaıdy QazAqparat tilshisi.

Aıta keteıik, 2018 jyldyń jeltoqsan aıynda Indýstrııa jáne ınfraqurylymdyq damý mınıstrligi «Nurly jer» baǵdarlamasy aýqymynda salynǵan jáne jeke qurylys salýshylardan satyp alynǵan turǵyn úıdi ótkizý Erejelerine tıisti ózgerister men tolyqtyrýlar engizdi.

Q. Altynbekovtiń aıtýynsha, osy sharalar jańa turǵyn úılerdiń sanyn ulǵaıtýǵa múmkindik beredi.

Sonymen qatar ol turǵyn úı qurylysyn qarjylandyrý men jergilikti atqarýshy organdar oblıgatsııalaryna toqtaldy.

«2018 jylǵy tamyzda Ulttyq bank «Baspananyń» baǵdarlama boıynsha turǵyn úı qurylysyn salý úshin ákimdikterdi qarjylandyrý múmkindigin retteı otyryp, «7-20-25» baǵdarlamasyna ózgerister men tolyqtyrýlar engizdi. Baspana ákimdikterdiń mýnıtsıpaldyq oblıgatsııalaryn satyp alý jolymen «revolverlik» qaǵıdaty boıynsha qarjylandyrý úshin 150 mlrd teńge bólýge daıyn. Qazirgi ýaqytta Shymkent qalasy ákimdigi «Baspanadan» 10 mlrd teńge mólsherinde qarjylandyrý tartty. Sondaı-aq Astana qalasy ákimdigi qyzyǵýshylyq bildirip, osy tetik arqyly qarjy tartý múmkindigin qarastyrýda», - dedi Qaırat Altynbekov.

Sonymen birge, Indýstrııa jáne ınfraqurylymdyq damý mınıstrligi «Nurly jer» baǵdarlamasyna jergilikti atqarýshy organdardyń («7-20-25» baǵdarlamasy boıynsha) «Baspanadan» qarjy tartý múmkindigin qamtıtyn ózgerister men tolyqtyrýlardyń jobasyn ázirleýde.

Atap aıtqanda, «7-20-25» baǵdarlamasy klıenti tabystaryna qoıylatyn talaptardy qatysýshy bank óz betinshe belgileıdi.

«7-20-25» baǵdarlamasy boıynsha berilgen ıpotekalyq turǵyn úı qaryzdarynyń taldamasyna sáıkes, kredıttiń ortasha somasy 11,7 mln teńgeni quraıdy. Ortasha merzimi - 19,9 jyl.

«Qaryz alýshylardyń jalpy sanynyń 22 paıyzyn quraıtyn eń iri sanaty aı saıyn nesıe boıynsha 60-80 myń teńge tóleıdi. Qaryz alýshylardyń 21 paıyzy 80-100 myń teńgeden tóleıdi. Osylaısha, qaryz alýshylardyń 60 paıyzy tóleıtin aı saıynǵy tólem 100 myń teńgeden aspaıdy», - dedi Q. Altynbekov.