Baspanamen qamtý: Úkimet basshysy birqatar oblystardy synǵa aldy
ASTANA. QazAqparat - QR Premer-Mınıstri Baqytjan Saǵyntaev xalyqty baspanamen qamtý jaǵynan qalyp kele jatqan óńirlerdi synǵa aldy, dep habarlaıdy QazAqparat tilshisi.
"Qurylys salasy 4,5 protsentke tómendep otyr. Qolda bar málimetterge qarasaq, keıbir óńirlerde, ásirese, ońtústik oblystarda, mysaly, Almaty, Jambyl men Qyzylorda oblystarynda búginge deıin birde-bir turǵyn úı iske qosylmaǵan. Soltústik Qazaqstanda da solaı. Bul degenimiz, baza joq. Baltyrǵy jyldyń qorytyndysy boıynsha "perexodıaşıı" úıler joq degen sóz. Endi, qazir barlyǵy respýblıkalyq bıýdjetten aqsha kútedi. Sol boıynsha tender bolady. Odan keıin fýndamentin bastaımyz. Jyldyń sońyna deıin tıisti kórsetkishke jetemiz degen josparlaryńyz durys emes", - dedi B.Saǵyntaev Mınıstrler kabınetiniń búgingi otyrysynda.
Úkimet basshysynyń aıtýynsha, jergilikti jerde ıgerilmeı jatqan qarjy bar. Sony paıdalaný qajet. "Áıtpese, ylǵı ótken jyldyń jetistikterin tilge tıek etip, sony sebep qylyp, aıtyp otyrý, menińshe, qurmetti áriptester, ásirese, óńirlik jerlerdegiler, ol - qate", - dep atap kórsetti B.Saǵyntaev.
Aıta keteıik, otyrys barysynda QR Qarjy mınıstri Baqyt Sultanov bıýdjet aqshasyn ıgerý boıynsha esep berdi. Onyń aıtýynsha, barlyq óńirlerdiń shottarynda qaldyq aqshanyń kólemi 291 mlrd teńgeni qurap, jyl basymen salystyrǵanda eki esege ósti. Jyldyń basynda atalǵan kórsetkish 124 mlrd teńge bolǵan.
"Bunyń barlyǵy jergilikti qarjy-qarajatty tıimsiz basqarýdy, joǵaryda aıtyp ketkendeı kiristerdi josparlaý sapasynyń tómendegin kórsetedi. Sondyqtan jergilikti atqarýshy organdar bıýdjet qarajatyn tıimdi paıdalaný máselesine basa nazar aýdarýy qajet", - deıdi B.Sultanov.
