Baspanamen qamtamasyz etýdiń jańa baǵdarlamasy bekitiledi

NUR-SULTAN. QazAqparat – 2025 jylǵa deıingi «Nurly jer» jańa memlekettik baǵdarlamasy bekitiledi. Bul týraly QR Indýstrııa jáne ınfraqurylymdyq damý mınıstri Beıbit Atamqulov málim etti, dep habarlaıdy QazAqparat tilshisi.

«Memleket basshysynyń saılaýaldy tuǵyrnamasyn iske asyrý aıasynda jyldyń sońyna deıin jańa «Nurly jer» baǵdarlamasy bekitiledi. Ol 5 mindetti qamtıtyn bolady: biryńǵaı turǵyn úı saıasatyn iske asyrý, halyqty sapaly aýyz sýmen jáne sý burý qyzmettermen qamtamasyz etý, kommýnaldyq sektordy jańǵyrtý jáne damytý, turǵyn úı qoryn kúrdeli jóndeý jáne jańartý, qurylys salasyn damytý», - dedi B. Atamqulov Parlament Májilisinde «Nurly jer» baǵdarlamasynyń júzege asyrylýyna arnalǵan Úkimet saǵatynda.

Osy oraıda, mınıstr onyń tetikteri arqyly barlyq qazaqstandyqtar tabys deńgeıge sáıkes turǵyn úımen qamtamasyz etiletinin atap ótti.

«Baǵdarlama jobasy Qazaqstanda buǵan deıin qoldanysta bolǵan turǵyn úı baǵdarlamalarynyń barlyq aspektileri men artyqshylyqtaryn qamtıdy. Jańa turǵyn úı saıasatynyń ıdeologııasy – bul árbir jumys isteıtin qazaqstandyq óz úıine ıe bolady. Osy maqsatta turǵyn úıdiń qoljetimdiligi birtindep artady jáne turǵyn úıge muqtaj árbir otbasyna turǵyn úı jaǵdaıyn jaqsartý tetigi usynylady», - dedi mınıstr.

Odan bólek, qazirgi ýaqytta Memleket basshysynyń tapsyrmasyna sáıkes, «Báıterek development» AQ, QIK jáne Turǵyn úı qoryna kepildik berý qory sııaqty jumys istep jatqan operatorlardy Biryńǵaı operatorǵa biriktirý jolymen Holdıngtiń turǵyn úı blogyn ońtaılandyrý jumysy júrgizilip jatyr. Biryńǵaı operator jobanyń barlyq kezeńderinde strategııalyq josparlaýdan bastap jobalardy tolyq súıemeldeýge deıin tikeleı qoldaýdy keshendi túrde kórsetetin bolady. Munda ınjınırıng, tsıfrlyq monıtorıng jáne keıin paıdalanýǵa berý birge júrgiziledi. Bul rette, Turǵyn úı qurylys jınaq banki turǵyn úı qurylys jınaqtar júıesin damytatyn eldegi jalǵyz operator retinde halyqqa jeńildikpen turǵyn úı qaryzdaryn berý jónindegi jumysty jalǵastyrady.

«Sonymen birge, Memleket basshysynyń tapsyrmasy boıynsha kópbalaly otbasylardyń turǵyn úı máselelerin sheshý úshin aldaǵy 3 jylda jyl saıyn qarjylandyrýdy ulǵaıtý jáne onymen 10 myń otbasyn qamtý josparlanǵan. «Baqytty otbasy» (2-10-25) jeńildikpen kredıt berý baǵdarlamasyna qatysýshylardyń sanyn 10 myńǵa deıin artpaq», - dedi B. Atamqulov.