Baspanaǵa muqtajdardyń kezegine turý quqyǵyna kimder ıe bolady
ASTANA. KAZINFORM – «Otbasy bank» bazasynda turǵyn úımen qamtamasyz etýdiń biryńǵaı ortalyǵy qurylady. Bul týraly Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan.
«Bıyl 30 qazanda Parlament «Qazaqstan Respýblıkasynyń keıbir zańnamalyq aktilerine turǵyn úı saıasatyn reformalaý máseleleri boıynsha ózgerister men tolyqtyrýlar engizý týraly» zań jobasyn maquldady. Ol azamattardy turǵyn úımen qamtamasyz etý boıynsha jańa tásilder men baǵyttardy kózdeıdi. Zań jobasy aıasynda «Otbasy bank» AQ bazasynda turǵyn úımen qamtamasyz etýdiń biryńǵaı ortalyǵyn qurý qarastyrylady. Bul turǵyn úıge kezekti ashyq qalyptastyrýǵa jáne ony muqtajdarǵa iske asyrý úshin «bir tereze» ádil qaǵıdatyn qoldanýǵa múmkindik beredi. Endi turǵyn úıge muqtajdardyń kezegine turý quqyǵyna sońǵy 5 jyl ishinde qandaı da bir sanatqa jatatynyna qaramastan, turǵyn úıi joq barlyq azamat ıe bolady. Bul rette, turǵyn úı berý tetigin tańdaý azamattyń tabysy men mártebesine sáıkes júzege asyrylady», - dedi birinshi vıtse-premer.
Onyń atap ótýinshe, budan basqa, zań jobasy aıasynda ınternet-resýrsta ózektendirilgen tizimderdi jarııalaı otyryp, kezekte turǵandardyń tizimin turaqty túgendeý kózdelgen. Bul kezektiń ádil jáne ashyq qalyptasýyn qamtamasyz etedi.
«Jalpy turǵyn úıge muqtaj azamattardy qoldaý quraldary retinde kommýnaldyq jalǵa beriletin turǵyn úı, kredıttik turǵyn úı salý, jeńildikti ıpotekalyq nesıeler (Otbasy bankiniń baǵdarlamalary, 7-20-25), turǵyn úı úshin bastapqy jarnany jabýǵa sertıfıkattar, kommýnaldyq qyzmetterdi óteýge turǵyn úı tólemder jáne basqa tetikter kózdelgen», - dedi Roman Sklıar.
Buǵan deıin Premer-Mınıstrdiń birinshi orynbasary Májilis depýtattarynyń «Naýryz» ıpotekalyq baǵdarlamasynyń bastapqy jarna mólsherin tómendetýge qatysty saýalyna jaýap bergenin jazǵan edik.
