Baspanaǵa muqtajdar sany nege artty – Úkimet túsindirmesi

- Úkimet depýtattar korpýsynyń turǵyn úı kezeginiń ósýine qatysty alańdaýshylyǵyn negizdi dep sanaıdy. Tizimderdegi muqtajdar sanynyń kúrt ósýi (937 myń adamǵa jetti) qurylys qarqynynyń tómendeýinen emes, turǵyn úı zańnamasyn túbegeıli qaıta qaraýdan týyndaǵanyn eskerý mańyzdy. 2025 jylǵy 24 mamyrdan bastap «Turǵyn úı qatynastary týraly» Zańǵa túzetýler óz kúshine endi. Eger buǵan deıin kezekke tek belgili bir sanattaǵy azamattar (áskerı qyzmetshiler, halyqtyń áleýmettik osal toptary) tura alsa, endi bul quqyq sońǵy 5 jyl boıy menshiginde turǵyn úıi joq elimizdiń barlyq kámeletke tolǵan azamattaryna berildi, - dedi Úkimet basshysy.

Onyń málimetinshe, júıege kóptegen muqtaj jandardyń qosylýy kezekke ýaqytsha «qysym» áserin týdyrdy. Biraq sonymen birge memlekettik saıasatty barynsha ádil, ashyq etti jáne árbir qazaqstandyq úshin teń jaǵdaı jasaldy. Qatań bıýdjettik shekteýlerge jáne júzdegen myń azamatqa bir sátte páter berýdiń obektıvti múmkin emestigine qaramastan, memleket qoldaý deńgeıin tómendetpeıdi, qaıta ony neǵurlym ıkemdi formattarǵa transformatsııalaıdy.

- Kezekte turǵan jáne tabysy eń tómengi kúnkóris deńgeıinen aspaıtyn adamdarǵa kómek kórsetý úshin jeke turǵyn úı qoryndaǵy jaldaý aqysyn tikeleı sýbsıdııalaý tetigi belsendi qoldanylady. Ol boıynsha memleket aı saıynǵy jaldaý qunynyń 50 %-yn jabady. Tabysy turaqty azamattar úshin, onyń ishinde halyqtyń áleýmettik osal toptaryna arnalǵan mólsherlemesi 7 %-dan bastalatyn «Naýryz» jáne múgedektigi bar adamdarǵa, jetim balalarǵa, kópbalaly otbasylarǵa arnalǵan «2- 10-20» baǵdarlamasy sııaqty aýqymdy áleýmettik ıpotekalyq baǵdarlamalar iske qosylyp, tabysty jumys istep jatyr. Sondaı-aq qaryz resimdeıtin kezekte turǵandarǵa ákimdikter bastapqy jarnany jabý úshin 1,5 mln teńgege deıingi mólsherde óteýsiz turǵyn úı sertıfıkattaryn beredi. Turǵyn úıdi bólý kezinde qatań basymdyq bekitilgen: memleket salǵan jáne satyp alǵan barlyq páterdiń 70 %-y tek eń muqtaj áleýmettik osal toptar arasynda bólinedi, - dedi Oljas Bektenov.

Buǵan deıin Úkimet qurylys sapasyna baqylaýdy kúsheıtetinin jazǵan edik.