Baspanaǵa muqtaj otbasylarǵa páter jaldaý aqysy 80 paıyzǵa deıin sýbsıdııalanbaq
«Búgingi kúni «Shańyraq» jeńildetilgen ıpotekalyq baǵdarlamasy pılottyq rejımde (2020-2022 jyldary) iske asyrylyp jatyr. Oǵan turǵyn úıge muqtajdar esebinde turǵan azamattar ǵana, ıaǵnı jergilikti atqarýshy organdarda kezekte turǵan adamdar qatysa alady. 2020 jyldan bastap osy baǵdarlama boıynsha 18 myń ótinim kelip tústi. Onyń ishinde búgingi kúni 6,7 myńǵa jýyǵy maquldandy», - dedi Asqar Mamın.
Onyń atap ótýinshe, «Shańyraq» baǵdarlamasy aıasynda ıpoteka boıynsha syıaqy mólsherlemesi jyldyq 5 paıyzdy quraıdy jáne bul eń tómen mólsherlemelerdiń biri bolyp tabylady. Baǵdarlamaǵa qatysýshylarǵa qoıylatyn talaptardyń biri - eńbek qyzmetinen túsetin tabystyń bolýy (otbasynyń árbir múshesine eń tómengi kúnkóris deńgeıiniń 3,7 eselengen mólsherinen aspaıtyn). Bul talap asa muqtaj kezekte turǵan adamdardy qoljetimdi turǵyn úımen qamtamasyz etý maqsatynda belgilengen.
«Ipotekalyq kredıt berý qarjy ınstıtýttary úshin joǵary táýekeldi quraldar bolyp sanalady. Qaryz alýshynyń eńbek qyzmetiniń kiristeri boıynsha tólem qabilettiligin baǵalaý mindettemelerdi ýaqtyly oryndaý úshin kepilger bolyp esepteledi jáne qarjy ınstıtýttarynyń kredıttik portfelindegi qaryzdardyń «jumys istemeıtin» táýekelderin boldyrmaıdy. «Shańyraq» pılottyq jobasyn iske asyrý úshin «Otbasy bank» AQ qarajatyn Ulttyq bank qaıtarymdy jáne aqyly negizde usyndy. Bul óz mindettemelerin oryndaýǵa qabiletti qaryz alýshylardy irikteýdi talap etedi. Joǵaryda aıtylǵandarǵa súıene otyryp, kiristerdi qujattyq rastaýsyz azamattardyń tólem qabilettiligin tekserý múmkin emes», - dedi ol.
Sonymen qatar Úkimet basshysy qazirgi ýaqytta kezekte turǵan adamdardy turǵyn úımen qamtamasyz etý máselelerin tıimdi sheshý maqsatynda Memleket basshysynyń tapsyrmasymen otbasynyń árbir múshesine 1 eń tómengi kúnkóris deńgeıine deıingi tabysy bar muqtaj kezekte turǵan adamdar úshin jeke turǵyn úı qorynda jaldaý aqysyn sýbsıdııalaý tetigin engizý máselesi pysyqtalyp jatqanyn aıtady.
«Osylaısha, jeke turǵyn úı qoryndaǵy jaldaý aqysyn memlekettik qarajat esebinen 80 paıyzǵa deıin sýbsıdııalaý josparlanǵan. Mysaly, naryqta jaldaý aqysy 100 myń teńge bolǵan jaǵdaıda, 1 eń tómengi kúnkóris deńgeıine deıingi tabysy bar kezekte turǵan adamdarǵa aı saıyn jaldaý aqysy esebine 80 myń teńge kóleminde sýbsıdııa beriledi. Sondaı-aq zańnamaǵa qajetti túzetýler qabyldanǵannan keıin «Otbasy bank» AQ ortalyqtandyrylǵan túrde turǵyn úıge muqtaj adamdardy kezekke qoıýdy jáne esepke alýdy júzege asyratyn, sondaı-aq «qoljetimdilik satylaryna» sáıkes kezekte turǵan adamdar úshin turǵyn úıdi basym túrde usynatyn bolady»,- dedi Asqar Mamın.
Premer-Mınıstrdiń atap ótýinshe, ol úshin árbir ótinimge kiristerdi, múlik pen aktıvterdi ashatyn otbasynyń tsıfrlyq portreti qalyptastyrylady. Osylaısha, bul tásil halyq úshin memlekettik qoldaýdyń ataýlyǵyn qamtamasyz etýge jáne turǵyn úı alýǵa muqtaj adamdardyń barlyq sanattaryn qamtýǵa múmkindik beredi», - dedi Asqar Mamın.
