Baspanaǵa qajetti jıhaz, turmystyq tehnıka sııaqty ilespe taýarlarǵa suranys artty – Ulttyq bank

ASTANA. KAZINFORM – Memlekettik turǵyn úı baǵdarlamalaryn iske asyrý esebinen turǵyn úıge suranys artty. Bul týraly Ulttyq bank tóraǵasy Tımýr Súleımenov aıtty.

- Qazaqstan ekonomıkasy tez ósip keledi. Jalpy ishki ónimniń bıylǵy 8 aıdaǵy ósimi 6,5 paıyzǵa jetti. Kólik, qurylys, saýda salalarynda jáne taý-ken óndirý, óńdeý ónerkásibinde joǵary ósim baıqalady. Halyqtyń taýarlar men qyzmetterge suranysy turaqty. Naqty kiristiń tómendeýinen tutynýshylyq kredıtteý men jınaqtalǵan qarajatty yqtımal paıdalaný esebinen suranys aıasy keńeıdi. Bólshek saýdanyń da ósý qarqyny jedeldedi. Oǵan negizgi úles qosqan – azyq-túlikke jatpaıtyn taýarlardyń satylýy. Memlekettik turǵyn úı baǵdarlamalaryn iske asyrý esebinen turǵyn úıge suranys artty. Sonyń saldarynan jıhaz, turmystyq tehnıka sııaqty ilespe taýralarǵa suranys kóbeıdi. Bul da baǵanyń ósýine qosymsha qysym kórsetti, - dedi Ulttyq bank basshysy.

Onyń aıtýynsha, ınvestıtsııalyq belsendilik jetkilikti deńgeıde joǵary. Qańtar-tamyz aılarynda ósim 14,3 paıyzdy qurady. Investıtsııalar qurylymynda bıýdjet qarajatynyń úlesi jalpy kólemniń 23 paıyzyna jetti. Ótken jyldyń osy kezeńimen salystyrǵanda olardyń kólemi 42,6 paıyzǵa ulǵaıdy.

- Іskerlik belsendilik ındeksi 2024 jylǵy naýryzdan oń aımaqta bolyp, iskerlik ortaǵa qatysty kásiporyndardyń optımızmin kórsetti. Ekonomıka ishindegi úrdister baǵaǵa joǵary qysymnyń saqtalyp otyrǵanyn kórsetti. Bul qazirgi ınflıatsııa dınamıkasynan kórinis taýyp otyr, - dedi Tımýr Súleımenov.

Buǵan deıin Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18 paıyz deńgeıinde belgileý týraly sheshim qabyldaǵan edi.