Baspana, jumys jáne grant: Qazaqstanda jastarǵa qandaı múmkindikter bar
ASTANA. KAZINFORM — Qazaqstanda jastar sany 6 mıllıonǵa jýyqtady. Olardyń baspana alýyna, jumysqa ornalasýyna, kásip bastaýyna jáne jańa jobalaryn júzege asyrýyna baǵyttalǵan túrli memlekettik baǵdarlamalar jumys istep jatyr. Qazirdiń ózinde 12 400 jas otbasy jeńildetilgen baǵdarlamalar arqyly baspanaly bolǵan.
Al tyń bastamalaryn júzege asyrǵysy keletin jastarǵa 3 mıllıon teńgege deıin grant beriledi. Jastarǵa arnalǵan múmkindikter týraly elordada ótken jıynda Mádenıet jáne aqparat mınıstrligi Jastar jáne otbasy isteri komıtetiniń tóraǵasy Qaırat Qambarov aıtyp berdi.
Búgin astanada L. N. Gýmılev atyndaǵy Eýrazııa ulttyq ýnıversıtetinde «Ulttyq damý kún tártibinde — jastar» atty sarapshylyq dıalog alańy ótti.
Jıynda Memleket basshysy Qasym-Jomart Toqaevtyń «Jańa tarıhı kezeńdegi Qazaqstannyń ózekti mindetteri» atty Joldaýynda belgilengen strategııalyq basymdyqtary talqylandy.
Jıynda Jastar jáne otbasy isteri komıtetiniń tóraǵasy Qaırat Qambarov búginde Qazaqstandaǵy jastar sany 6 mıllıonǵa jýyqtaǵanyn atap ótti.
— Qazirgi kezde jastar el halqynyń úshten birine jýyq bóligin quraıdy. Sondyqtan olardyń qoǵamdyq ómirge belsendi aralasýy, memlekettik bastamalardy júzege asyrýǵa qatysýy jáne el damýyna úles qosýy mańyzdy, — dedi spıker.
12 400 jas otbasy baspanaly boldy
Onyń sózinshe, jastardy tolǵandyratyn negizgi máselelerdiń biri — baspana. Komıtet tóraǵasynyń dereginshe, elimizdiń 17 óńirinde jastarǵa arnalǵan jeńildetilgen turǵyn úı baǵdarlamalary júzege asyrylyp jatyr. Osy baǵdarlamalardyń kómegimen 12 400 jas otbasy baspanaly bolǵan.
— Sonymen qatar Otbasy bank salymshylarynyń 42 paıyzdan astamyn 35 jasqa deıingi azamattar quraıdy. Olardyń sany 283 myńnan asady. Budan bólek, aýyldy jerlerge jumys isteýge baratyn jas mamandar úshin de turǵyn úı satyp alýǵa múmkindik beretin qoldaý sharalary qarastyrylyp otyr. Atap aıtqanda, baspana alýǵa beriletin bıýdjettik nesıe kólemi 10 mıllıon teńgeden asady, — dedi Qaırat Qambarov.
Budan basqa, nesıelik turǵyn úı qurylysyn qarjylandyrýǵa arnalǵan jyldyq 2,5 paıyzdyq jeńildetilgen qarajat kólemi ulǵaıtylǵan. Baspana kezegine turý jáne turǵyn úıdi bólý úderisi de avtomattandyrylǵan.
Komıtet tóraǵasynyń aıtýynsha, mundaı baǵdarlamalar jastardyń turmys sapasyn jaqsartyp qana qoımaı, olardyń óz óńirinde turaqtap qalýyna da yqpal etedi.
Jastardyń 30 jobasyna 3 mıllıon teńgeden beriledi
Memleket jastardyń shyǵarmashylyq, ǵylymı jáne kásipkerlik bastamalaryn qoldaýǵa da qarjy bólip otyr. Sonyń biri — jyl saıyn júzege asyrylatyn «Táýelsizdik urpaqtary» granty.
— Bul bastama aıasynda respýblıkalyq deńgeıde úzdik dep tanylǵan 30 jobaǵa 3 mıllıon teńgeden qarjylaı qoldaý kórsetiledi. Baǵdarlamanyń negizgi maqsaty — jastardyń tyń ıdeıalaryn júzege asyrýyna múmkindik berý jáne olardyń óz áleýetin damytýyna jaǵdaı jasaý. Sonymen qatar elimizde daryndy jastardy yntalandyrýǵa baǵyttalǵan «Daryn» memlekettik jastar syılyǵy bar. Ol túrli salada jetistikke jetken jastardy qoldaýǵa arnalǵan, — dedi spıker.
Komıtet tóraǵasy jastarǵa qarjylaı kómek kórsetýmen qatar, olardyń óz betinshe damýyna múmkindik beretin jaǵdaı qalyptastyrý da mańyzdy ekenin jetkizdi.
Jastardy jumyspen qamtýǵa qandaı jobalar kómektesedi
Jastar saıasatynyń taǵy bir mańyzdy baǵyty — jumyspen qamtý jáne kásibı biliktilikti arttyrý. Bul rette bilim berý júıesi men eńbek naryǵynyń baılanysyn nyǵaıtýǵa basymdyq berilip otyr.
Qaırat Qambarovtyń aıtýynsha, Astanada «Jol tap» baǵdarlamasy, al basqa óńirlerde «Talaptan — múmkindikter alańy» jobalary júzege asyrylyp jatyr.
— Bul bastamalar jastardyń suranysqa ıe mamandyqtardy meńgerýine jáne jumysqa ornalasý úshin qajetti praktıkalyq daǵdylardy qalyptastyrýyna kómektesedi. Sonymen qatar tsıfrlandyrý men jasandy ıntellekttiń damýy jastardyń kásibı daıyndyǵyna jańa talaptar qoıyp otyr. Osyǵan baılanysty olardyń tsıfrlyq saýattylyǵyn arttyrý, jańa tehnologııalardy meńgerýine jaǵdaı jasaý jáne ınnovatsııalyq oılaý qabiletin damytý mańyzdy, — dedi ol.
«Taza Qazaqstanǵa» 2 mıllıonnan astam jas qatysty
Jastardyń qoǵamdyq belsendiligin arttyrýǵa baǵyttalǵan bastamalardyń biri — «Taza Qazaqstan» jalpyulttyq aktsııasy.
Qaırat Qambarov keltirgen málimetke sáıkes, osy bastama aıasynda elimizde 7 myńǵa jýyq is-shara uıymdastyrylǵan. Olarǵa 2 mıllıonnan astam jas qatysqan.
— Ekologııalyq mádenıetti qalyptastyrý bir rettik senbiliktermen shektelmeýi kerek. Qorshaǵan ortaǵa jaýapkershilikpen qaraý jastardyń kúndelikti ómir saltyna aınalýǵa tıis, — dedi komıtet tóraǵasy.
Sonymen birge jıynda jastardyń azamattyq belsendiligin arttyrý, memlekettik ınstıtýttarmen jáne bıznes ókilderimen ózara baılanysyn nyǵaıtý máseleleri de qozǵaldy.
Qaırat Qambarov jastardyń memlekettik qoldaý sharalaryn paıdalanýmen ǵana shektelmeı, eldegi ekonomıkalyq jáne qoǵamdyq ózgeristerge belsendi qatysýy qajet ekenin jetkizdi.
Aıta keteıik, buǵan deıin Qazaqstanda jastar densaýlyǵyn nyǵaıtýǵa arnalǵan halyqaralyq baǵdarlama iske qosylǵany habarlandy.
