Baspana xalyqqa barynsha qoljetimdi bolady - Qurylysshylar odaǵy
ASTANA. QazAqparat - QR Qurylysshylary odaǵynyń tóraǵasy Talǵat Erǵalıevtiń aıtýynsha, aldaǵy ýaqytta elimizdegi jyljymaıtyn múliktiń baǵasy túspeıdi. Alaıda qurylys kompanııalary xalyqtyń suranysyna qaraı shaǵyn páterlerdi kóptep salady. Sonyń arqasynda arzan baǵaǵa baspana satyp alýǵa múmkindik týady, dep xabarlaıdy QazAqparat tilshisi.
«Shyny kerek, búginde xalyqtyń baspanaǵa degen suranysy áli de joǵary bolyp tur. Biraq osy salada anyq bir ózgeris baıqalady. 40 sharshy metrden artyq páterlerge degen suranys tómendep keledi. Qazir adamdar 4-5 mln teńge shamasynda turatyn baspanany kóptep izdeıdi. Sebebi oǵan aqshalary jetip tur. Al ondaı páterlerdiń aýdany 24-28 sharshy metr. Halyq tarapynan osyndaı baspanaǵa suranys joǵary. Endi, qurylys naryǵy soǵan qaraı beıimdeletin bolady», - dedi T.Erǵalıev QazAqparat tilshisine bergen suxbatynda.
Uıym basshysynyń aıtýynsha, qazirgi kezde xalyq birden úlken páterdi satyp alǵan qıynǵa túsetinin ábden túsindi. Sol sebepti shaǵyn baspanany alyp jatyr. «Adamnyń ál-aýqaty ósken saıyn sol shaǵyn páterdi satyp jiberip, ústine aqsha qosyp, odan da úlken úıdi alýǵa bolady. Halyq osyny túsine bastady. Jalpy, jyljymaıtyn múlik naryǵynda baǵa túsedi degenge kóp sene berýge bolmaıdy. Úıdiń baǵasy tek jańaǵy jolmen, ıaǵnı baspananyń aýdanyn azaıtý arqyly ǵana arzandatýǵa múmkindik bar», - dep atap kórseti Talǵat Faızollauly.
