Baspana úlestirý boıynsha Qazaqstannyń qaı óńirleri kósh bastap tur

ASTANA. QazAqparat - QR Investıtsııalar jáne damý mınıstri Jeńis Qasymbek baspanany paıdalanýǵa berý boıynsha alǵashqy oryndardan kóringen óńirlerdi atady, dep habarlaıdy QazAqparat tilshisi.

«10 aıdyń qorytyndysy boıynsha qurylysy júrgizilgen úılerdiń 9,8 mln sharshy metri paıdalanýǵa berilgen. Bul kórsetkish 2017 jyldyń alǵashqy 10 aıymen salystyrǵanda 111,6 paıyzǵa artyq. Jyldyq josparmen eseptegende paıdalanýǵa berý aýqymynyń 81 paıyzy oryndalyp qoıdy. Jyl sońyna deıin 12,1 mln sharshy metr úı óz ıesin tabady», - deıdi Jeńis Qasymbek.

Mınıstrdiń aıtýynsha, respýblıkada jalpy 85 990 turǵyn úı, onymen birge 30 704 jeke úı ótkizilip qoıǵan.

«Turǵyn úıdi paıdalanýǵa berý boıynsha ósim elimizdiń 14 óńirinde jalǵasyp jatyr», - dedi Jeńis Qasymbek.

QR Investıtsııalar jáne damý mınıstrliginń málimetine súıensek, úıdi paıdalanýǵa berý jaǵynan Jambyl (141,5%), Mańǵystaý (139,7%) oblystary, Shymkent qalasy (135,2%), Almaty (130,3%), Túrkistan (121,1%), Batys Qazaqstan (119,9%) jáne Aqtóbe (119,3%) oblystary kósh basyna shyqqan.

Al bul rette tómen kórsetkishti Qyzylorda (92,6%), Pavlodar (95,9%) oblystary men Astana (92,9%) qalasy kórsetip otyr.