Baspana satyp alý mámilelerin onlaın jasaýǵa múmkindik týady

ASTANA. KAZINFORM – Taıaý ýaqytta «Enotary» platformasynda jyljymaıtyn múlikti satý mámilelerin onlaın jasaýǵa múmkindik týady. Bul týraly Ortalyq kommýnıkatsııalar qyzmetindegi brıfıngte Ádilet vıtse-mınıstri Bekbolat Moldabekov málim etti.

- Notarıaldyq onlaın-mámile iske qosamyz. Taıaý ýaqytta qulaqtandyrý bolady. Ózderińiz biletindeı, burynyraq biz «Enotary» jobasyn iske qosqan edik. ıAǵnı, álemniń kez kelgen núktesinen telefon arqyly notarıýsqa vıdeoqońyraý shala alasyz, oǵan baryp senimhat rásimdeýdiń qajeti joq. Eki jylǵa jýyq ýaqyt synaqtan ótkizdik, qaradyq, eshqandaı keıistik, problema bolmady. Azamattardan shaǵym túspedi. Soǵan oraı endigi ýaqytta atalǵan platformaǵa jyljymaıtyn múlikti satýdy da qosqymyz keledi. Buǵan qosa bul onlaın ıpoteka da. Eger siz onlaın ıpoteka rásimdeseńiz, onda bankke 10-15 ret barýdyń qajeti bolmaıdy. Bul jumysty notarıýsqa vıdeoqońyraý shalý arqyly oryndaı alasyz. Árıne, notarıýs bárin qaıta tekseredi. Sonymen qatar siz bıometrııadan ótesiz. Telefonyńyzǵa sms keledi. Demek, qaýipsizdiktiń 3-4 kezeńi bar, platforma tolyqtaı qaýipsiz, - dedi Bekbolat Moldabekov.

Onyń atap ótýinshe, 2023 jyldyń sáýirinen senimhat, kómek jáne erli-zaıyptylardyń kelisimi syndy notarıaldyq qyzmetter onlaın formatqa kóshirilgen. Joba iske qosylǵan sátten beri 220 myńnan astam tsıfrlyq senimhat rásimdeldi jáne atalǵan qyzmetterge azamattar tarapynan eshqandaı shaǵym bolǵan joq. 

Eske salsaq, elde senimhattardy onlaın alýǵa bolatynyn jáne senimhattardy onlaın rásimdeý notarıýstardyń jumysyna qalaı áser etetini týraly jazǵan bolatynbyz.