Baspana salýǵa BJZQ qarajatyn tikeleı ınvestıtsııalaý tıimsiz – Úkimet basshysy
ASTANA. KAZINFORM – Áleýmettik jyljymaıtyn múlik qurylysyn qarjylandyrý úshin BJZQ qarajatyn tikeleı ınvestıtsııalaý tıimsiz. Bul týraly Májilis depýtattarynyń saýalyna Úkimet basshysy Oljas Bektenovtiń jaýabynda aıtylǵan.
«Zeınetaqymen qamsyzdandyrý júıesiniń turaqtylyǵyn arttyrýdyń mańyzdy elementteriniń biri – zeınetaqy jınaqtarynyń saqtalýyna, eseleýine jáne naqty qunynyń saqtalýyna baǵyttalǵan tıimdi ınvestıtsııalyq basqarý. Áleýmettik jyljymaıtyn turǵyn úı qurylysyna salynǵan ınvestıtsııada birshama táýekel bar. Ol teris rentabeldilikke, ashyqtyqtyń bolmaýyna jáne salynǵan qarajattyń qaıtarymdylyǵyna baılanysty bolady. Sondaı-aq zeınetaqy aktıvterin naryqtyq emes qaǵıdattarda, onyń ishinde zeınetaqymen qamsyzdandyrý maqsattarynan basqa áleýmettik jáne ózge de mindetterdi sheshý úshin naryqtyq mólsherlemelermen salystyrǵanda tómen kiristilikpen ınvestıtsııalaýǵa jol berilmeıdi. Óıtkeni bul uzaq merzimdi kezeńdegi jınaqtaýshy zeınetaqy júıesiniń qarjylyq turaqtylyǵyna jáne salymshylardyń zeınetkerlikke shyǵý kezindegi jınaqtarynyń jetkiliktilik deńgeıine teris áser etedi», - dedi Premer-Mınıstr jaýabynda.
Onyń atap ótýinshe, Qazaqstanda zeınetaqy qoryna aýdarymdardyń sıngapýrlyq modelin iske asyrý kezinde (azamat tabysynyń 20% jáne jumys berýshiden 20%) teris saldarlar bolýy múmkin. Mysaly, Qazaqstan azamattarynyń jalaqysy Sıngapýrǵa qaraǵanda edáýir tómen jáne aýdarymdar mólsheriniń artýy olardyń qosymsha tómendeýine ákeledi. Nátıjesinde áleýmettik shıelenis paıda bolady. Budan basqa, mindetti aýdarymdar boıynsha júktemeni azaıtý maqsatynda jumys berýshiler tarapynan resmı jalaqynyń mólsherin ádeıi tómendetý táýekelderi týyndaýy múmkin.
«Sonymen qatar qazirgi ýaqytta azamattarǵa turǵyn úı satyp alýǵa bastapqy jarna engizý, turǵyn úı salymdaryn tolyqtyrý, ıpotekalyq qaryzdar boıynsha bereshekti óteý jáne taǵy basqalary úshin Biryńǵaı jınaqtaýshy zeınetaqy qorynan artyq qarajatty alý arqyly turǵyn úı jaǵdaılaryn jaqsartý múmkindigi usynyldy. Qurylys salasy óte joǵary táýekeldi salalarǵa jatatynyn eskere otyryp, osy kezeńde áleýmettik jyljymaıtyn múlik qurylysyn qarjylandyrý úshin BJZQ qarajatyn tikeleı ınvestıtsııalaý tıimsiz dep sanaımyz. Óz kezeginde azamattardy qoljetimdi baspanamen qamtamasyz etý úshin memleket sharalar keshenin qabyldaýda», - dedi Oljas Bektenov.