Baspana salǵanda bıýdjet aqshasyna qarap otyra berýge bolmaıdy - Saǵyntaev

ASTANA. QazAqparat - Úkimettiń búgingi otyrysynda «Nurly jer» memlekettik baǵdarlamasy boıynsha jarty jyldyń ishinde atqarylǵan jumystar qaraldy. Premer-Mınıstr Baqytjan Saǵyntaev ákimderge bıýdjet aqshasyna qaraı bermeı, jeke menshik qurylys salasyn damytý máselesin de nazardan tys qaldyrmaýǵa úndedi, dep xabarlaıdy QazAqparat tilshisi.

Úkimet basshysynyń aıtýynsha, ótken aptada Prezıdent Nursultan Nazarbaev buǵan deıin bólingen 210 mlrd teńgeni qaıta taratý sharasyn maquldady. Endi, ol aqsha ákimdikterge kredıttik baspanany salý úshin aýdarylatyn bolady. «Ol qarajatty durys aınaldyryp, «revolverlik» ádispen qurylysqa qaıta salyp otyrǵan jón. Biraq jeke menshik qurylys salasyn da umytpaý qajet. Prezıdent te osy máselege erekshe mán bergen bolatyn. Bul - ákimderdiń jumysy. Bálkim, Prezıdent aımaqtardy aralaǵanda memlekettik baǵdarlamadan tys jeke menshik qurylys kompanııalaryn tartý jumysy jaıynda suraıdy. Sondyqtan osy máseleni qaperde ustaǵanyńyz abzal», - dep atap kórsetti Saǵyntaev.

Aıta keteıik, otyrys barysynda QR Investıtsııalar jáne damý mınıstri Jeńis Qasymbek «Nurly jer» memlekettik baǵdarlamasy boıynsha jarty jyldyń ishinde atqarylǵan jumystar jaıynda baıandap berdi.