Baspana, mektep, sý qubyrlary: Antıkor qurylysy uzaqqa sozylǵan jobalardy baqylaýǵa aldy
ASTANA. KAZINFORM — Sybaılas jemqorlyqqa qarsy is-qımyl agenttigi qurylysy uzaqqa sozylǵan áleýmettik nysandardy súıemeldeý jáne monıtorıngteý jumystaryn jalǵastyrady. Bıyl qurylysy 4 jylǵa deıin sozylǵan 6 problemalyq nysan qoldanysqa berildi. Qazir el boıynsha qurylysy uzaqqa sozylǵan 152 nysan agenttik baqylaýynda tur.
Qurylysy uzaqqa sozylǵan nysandardy súıemeldeý jobasy 2023 jyldyń qazan aıynda iske qosylǵan edi. Osy sátten beri 87 nysannyń qurylysy aıaqtaldy. Olardyń qatarynda mektepter, turǵyn úıler, sporttyq jáne mádenı nysandar, sondaı-aq kópirler men sý qubyry jelileri bar.
− Eń kóp nysan qurylysy aıaqtalǵan óńir — Pavlodar oblysy (14), Aqtóbe oblysy (10), Qyzylorda oblysy (8) jáne Astana qalasy, Túrkistan, Aqmola jáne Batys Qazaqstan (6) oblystary kósh bastap tur. Bul jobalardyń barlyǵy turǵyndar úshin, ásirese shalǵaı, aýyldyq eldi mekenderdegi halyq úshin asa mańyzdy. Endi myńdaǵan balany sapaly bilimmen qamtıtyn 20 mektep, kópbalaly otbasylar men jetim balalarǵa arnalǵan 12 turǵyn úı qoldanýǵa berildi, − dedi Danııar Bıgaıdarov Sybaılas jemqorlyqqa qarsy qyzmette ótken brıfıngte.
Sonymen birge, 9 sport nysany, 8 mádenıet jáne demalys nysany, 4 densaýlyq saqtaý nysany jáne 4 kópir men 3 balabaqsha ashylady.
Taza aýyz sýmen qamtamasyz etýge de erekshe kóńil bólinip otyr. Nátıjesinde 26 eldi meken taza sýǵa qol jetkizdi, bul jergilikti turǵyndardyń ómir sapasyna tikeleı áser etedi. Pavlodar oblysynda Kúrkeli, Baıanaýyl jáne Shuǵa aýyldarynda sý qubyry jelileri iske qosyldy. Bul jobalar 400-den astam úı sharýashylyǵyn taza aýyz sýmen qamtamasyz etti.
− Soltústik Qazaqstan oblysyndaǵy Sergeevka qalasynda úsh jyl boıy kútken 27 páterli turǵyn úı paıdalanýǵa berildi. Bul úı 2022 jyly aıaqtalýy kerek edi. Páterler kópbalaly otbasylarǵa, jetim balalarǵa jáne áleýmettik osal toptarǵa berildi. Qostanaı qalasynda 45 páterli turǵyn úı qurylysy aıaqtalyp, keshigip bolsa da paıdalanýǵa berildi. Atyraý oblysynyń Sarytoǵaı aýylynda mádenıet úıiniń qurylysy aıaqtaldy. Bul nysannyń qurylysy 8 jylǵa sozylǵan bolatyn, − dedi resmı ókil.
2025 jyldyń ekinshi toqsanynda eldiń túrli óńirlerinde taǵy 15 nysannyń qurylysy aıaqtalady dep josparlanǵan. Olardyń qatarynda Aqmola, Shyǵys Qazaqstan, Pavlodar, Jambyl, Aqtóbe, Qostanaı, Túrkistan, Ulytaý oblystary men Almaty, Shymkent qalalary bar. Bul jobalar turǵyn úılermen qatar, mektepter, sport jáne mádenıet nysandary sııaqty áleýmettik ınfraqurylym nysandaryn qamtıdy.
Aıta keteıik, 2022 jyldan beri memleketke jáne kvazımemlekettik sektor sýbektilerine 1 trıllıon 130 mıllıard teńgeden astam aktıv qaıtaryldy. Aktıvterdiń edáýir bóligi — 670 mıllıon AQSh dollary shetelden qaıtqan.
Sybaılas jemqorlyqtan tárkilengen aqshaǵa elimizde 89 mektep salynyp jatyr.