Baspana qurylysy: Prezıdenttiń saılaýaldy baǵdarlamasy qalaı oryndalyp jatyr
ASTANA. KAZINFORM — Bir jylda turǵyn úı qurylysyna salynǵan ınvestıtsııa kólemi artty. Bul týraly QR ÓQM Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov málim etti.
— Memleket basshysynyń saılaýaldy baǵdarlamasyna sáıkes, jeti jyl ishinde elde 111 mln sharshy metr turǵyn úı salý mindeti júkteldi. Úshinshi jyl qatarynan turǵyn úı qurylysy josparlanǵan kórsetkishten asyra oryndalyp jatyr. Qazirgi kezde Prezıdenttiń saılaýaldy baǵdarlamasy 51,4 paıyzǵa oryndaldy, — dedi Baqytjan Júnisbekov Ortalyq kommýnıkatsııalar qyzmetindegi baspasóz máslıhatynda.
Osy oraıda ol 2025 jyly josparlanǵan 19,2 mln sharshy metrdiń ornyna el boıynsha 20,1 mln sharshy metr baspana paıdalanýǵa berilgenin aıtty.
Onyń ishinde 13,7 mln sharshy metri kóppáterli úıler jáne 6,4 mln sharshy metr jeke turǵyn úı sanatynda. Turǵyn úı qurylysyna salynǵan ınvestıtsııalar 2024 jylmen salystyrǵanda 5%-ǵa ósip, 3,8 trln teńgege jetti.
Budan buryn habarlanǵandaı, jańa ereje boıynsha 70 myń qazaqstandyq jalǵa berilgen baspanany jekeshelendire alady.