Baspana kezeginde turǵandar qandaı jeńildikterdi paıdalana alady
ASTANA. KAZINFORM – Qazaqstanda baspana kezeginde 988 myńnan astam azamat tur. Onyń 459 myńǵa jýyǵy áleýmettik osal toptarǵa jatady. Baspanaǵa muqtaj azamattar memleketten jaldamaly úı ala alady, tómen paıyzben ıpoteka rásimdeýge, alǵashqy jarnanyń bir bóligin turǵyn úı sertıfıkaty arqyly óteýge jáne páter jaldaý aqysyna sýbsıdııa alýǵa múmkindigi bar. Bul kómektiń árqaısysynyń óz talaby bar: birinde otbasynyń tabysy eskerilse, endi birinde azamattyń qaı sanatqa jatatyny mańyzdy. Kazinform tilshisi turǵyn úı kezeginde turǵan azamattarǵa qandaı qoldaý kórsetiletinin jáne ony kimder qandaı shartpen ala alatynyn tarqatyp jazdy.
QR Ónerkásip jáne qurylys mınıstrliginiń málimetinshe, bıyl memlekettik qoldaý esebinen baspanaǵa muqtaj azamattardy turǵyn úımen qamtý úshin 12,6 myń kredıttik páter salý jáne satyp alý josparlanǵan. Bul maqsatqa 155,5 mıllıard teńge qarastyrylǵan. Sonymen qatar 269 mıllıard teńgege 13,5 myń jaldamaly páter alý kózdelip otyr. Bul qarajat ákimdikterge oblıgatsııalyq qaryz túrinde beriledi.
Budan bólek, jalpy sıpattaǵy transfertter esebinen 71,9 mıllıard teńgege taǵy 3,5 myń jaldamaly páter satyp alý josparlanǵan.
Jaldamaly baspanany bólý tártibi ózgerdi
QR Ónerkásip jáne qurylys mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekovtiń aıtýynsha, turǵyn úı reformasynan keıin jaldamaly baspanany bólý tártibi ózgergen.
— Jaldamaly baspana turǵyn úıge muqtaj azamattyń kezekke qoıylǵan kúni men otbasynyń tabys deńgeıine qaraı bólinedi. Bıylǵy segiz aıda azamattarǵa 12 653 jaldamaly páter berildi, - dedi Baqytjan Júnisbekov.
Sonymen qatar vedomstvo ókili 2024 jyldyń jeltoqsanynan bastap azamattarǵa memlekettik turǵyn úı qoryndaǵy baspanany jekeshelendirýge múmkindik berilgenin atap ótti. Sodan beri bul múmkindikti 20 myńnan astam azamat paıdalanǵan. Al bıylǵy segiz aıda 6 824 otbasy memlekettik turǵyn úı qoryndaǵy baspanasyn jekeshelendirgen. Onyń 3 649-y baspanasyn óteýsiz negizde jekeshelendirýge múmkindik aldy.
Aıta keteıik, elimizde tabysy joq nemese tabysy tómen azamattardyń tórt sanatyna páter jaldaý aqysynyń bir bóligin memleket óteıdi. Alaıda baǵdarlama talaptary saqtalmasa, sýbsıdııa toqtatylady.
2% jáne 5%-dyq ıpoteka: kimder ótinish bere alady
Qazaqstanda turǵyn úıge muqtaj azamattarǵa 2 jáne 5 paıyzdyq jeńildetilgen ıpoteka beriledi. Bıyl osy baǵytta 12,6 myń qaryz berý josparlanǵan. Oǵan 175,1 mıllıard teńge qarastyrylǵan.
Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekovtiń aıtýynsha, 2 paıyzdyq jeńildetilgen ıpoteka turǵyn úıge muqtaj retinde esepte turǵan áleýmettik osal sanattaǵy azamattarǵa beriledi.
2 paıyzdyq ıpotekaǵa myna azamattar ótinish bere alady:
– Uly Otan soǵysynyń ardagerleri;
– jetim balalar;
– kópbalaly analar men kópbalaly otbasylar;
– I jáne II toptaǵy múgedektigi bar adamdar;
– múgedektigi bar balalardy tárbıelep otyrǵan otbasylar;
– jeńildikteri boıynsha Uly Otan soǵysynyń ardagerlerine teńestirilgen ardagerler;
– basqa memleketterdiń aýmaǵyndaǵy urys qımyldarynyń ardagerleri;
– jesirler.
– Ipoteka alý úshin otbasynyń ár múshesine shaqqandaǵy tabys 5 eń tómengi kúnkóris deńgeıinen, ıaǵnı 254 255 teńgeden aspaýǵa tıis. Bıylǵy segiz aıdyń qorytyndysy boıynsha 3 954 azamat osy baǵdarlama arqyly baspanaly boldy, - dedi komıtet tóraǵasy.
Sondaı-aq, onyń aıtýynsha, qalǵan sanattaǵy azamattarǵa tabys deńgeıine shekteý qoıylmaıtyn 5 paıyzdyq ıpoteka qoljetimdi. Jyl basynan beri bul múmkindikti 2 252 azamat paıdalanǵan.
Alǵashqy jarnaǵa 1,5 mıllıon teńgege deıin beriledi
Jeńildetilgen ıpoteka rásimdeıtin azamattarǵa alǵashqy jarnanyń bir bóligin tóleýge turǵyn úı sertıfıkaty beriledi.
Vedomstvo ókiliniń dereginshe, onyń kólemi 1,5 mıllıon teńgege deıin jetedi jáne bul qarajatty memleketke qaıtarýdyń qajeti joq.
– Turǵyn úı sertıfıkatyn kimder alatynyn jáne onyń naqty mólsherin jergilikti máslıhattar belgileıdi. Sertıfıkat alý úshin otbasynyń ár múshesine shaqqandaǵy tabys 157 638 teńgeden aspaýy kerek, - dedi ol.
Bıylǵy segiz aıda 2 373 turǵyn úı sertıfıkaty berilgen. Olardyń jalpy somasy – 2,7 mıllıard teńgeni quraıdy.
Memleket páteraqynyń bir bóligin óteıdi
Qazaqstanda tabysy joq nemese tabysy tómen azamattardyń tórt sanatyna páter jaldaý aqysynyń bir bóligin memleket óteıdi. Alaıda baǵdarlama talaptary saqtalmasa, sýbsıdııa toqtatylady.
Baqytjan Júnisbekovtiń aıtýynsha, arendalyq baspana kezegin kútip júrgen tabysy joq nemese tabysy tómen azamattardyń tórt sanatyna memleket jeke turǵyn úı qorynan jalǵa alǵan páter aqysynyń bir bóligin óteıdi.
— Sýbsıdııa jetim balalarǵa, kópbalaly analar men kópbalaly otbasylarǵa, I jáne II toptaǵy múgedektigi bar adamdarǵa, sondaı-aq múgedektigi bar balalardy tárbıelep otyrǵan otbasylarǵa beriledi. Ony alý úshin otbasynyń ár múshesine shaqqandaǵy tabys sońǵy alty aıda aıyna 50 851 teńgeden aspaýǵa tıis. Zeınetaqy men járdemaqy tabys retinde esepke alynbaıdy, - dedi spıker.
Onyń málimetinshe, qazir mundaı kómekti 11 200 otbasy alyp otyr.
Sondaı-aq, baǵdarlama boıynsha jaqyn týystarynan baspana jaldaýǵa bolmaıdy. Oǵan qosa, sýbsıdııa alyp otyrǵan azamat jalǵa alǵan páterinde ózi turýy kerek.
— Ákimdikter mundaı páterlerdi turaqty tekserip otyrady. Eger tekserý kezinde azamattyń jalǵa alǵan páterinde turmaıtyny nemese otbasy múshesinen baspana jaldap otyrǵany anyqtalsa, sýbsıdııa tóleý toqtatylady. Mundaı jaǵdaıda tólemdi qaıta qalpyna keltirý múmkindigi qarastyrylmaǵan, — dedi Baqytjan Júnisbekov.
Aıta keteıik, buǵan deıin Qazaqstanda jalǵyz baspanasy apatty dep tanylǵan azamattarǵa turǵyn úı bólýge qatysty ózgeris engizilgeni habarlandy. Endi jergilikti bıýdjet esebinen salynǵan nemese satyp alynǵan baspanany olarǵa bólý máselesin ákimdikter qaraıdy.
