Baspana kezeginde turǵan shyǵysqazaqstandyqtarǵa jer ýchaskesi berilýde
ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov keler jyly salynatyn jer úılerdiń qurylysyna qatysty arnaıy jıyn ótkizip, tıisti tapsyrmalar berdi, dep habarlaıdy QazAqparat tilshisi.
Óńirde jeke turǵyn úı qurylysyn júrgizý maqsatynda kezekte turǵan azamattarǵa jer telimin berý jumystary jalǵasýda. Basty talap – berilgen jer telimin ýaqtyly ári maqsatty paıdalaný. Kóp jaǵdaıda jerdiń ıgerilmeýine ınjenerlik ınfraqurylymnyń joqtyǵy sebep bolyp jatady.
Osy máseleni sheshý úshin Shyǵys Qazaqstanda jeke turǵyn úı qurylysyna beriletin jer telimderi qarastyrylǵan aýmaqtardy kezeń-kezeńmen qarjylandyrý jospary bekitilip otyr. Qazirgi tańda Óskemen, Semeı jáne Aıagóz qalalaryndaǵy 1 kezeńge kirgen jer ýchaskeleriniń jalpy sany 2 591 quraıdy. Barlyǵy ınjenerlik-kommýnıkatsııalyq ınfraqurylymmen qamtamasyz etilgen. Onyń ishinde 1700 ýchaske turǵyn úı salýǵa berildi. Qazirgi tańda olardyń 602-inde jumys aıaqtalsa, al 790 ýchaskede qurylys jumystary áli bastalmaǵan.
«Jer alǵan turǵyndar onda úı salýlary tıis. Qajetti ınfraqurylym júrgizip, jaryq pen sý tarttyq. Sondyqtan berilgen ýchaskelerde qurylys jumystary júrip jatqanyn qatań baqylaýymyz qajet», - dedi aımaq basshysy Danıal Ahmetov.
Jeke turǵyn úı qurylysy Óskemen qalasyndaǵy 20 shaǵyn aýdanda qarqyndy júrip jatyr. Búginde shahar turǵyndary salǵan 119 úı qoldanysqa berilip, taǵy 120 úıdiń qurylysy júrgizilýde. Semeıde Ushaqtar, Komsomolskıı, Aıagóz qalasyndaǵy Mıasokombınat shaǵyn aýdandarynda da bul baǵyttaǵy jumystar jalǵasýda.
Aıta keteıik, búginde Óskemen boıynsha jeke turǵyn úı qurylysyn salý úshin jer telimderin alýǵa kezekte – 4206, Semeıde – 24473 adam tur.
