Baspana kezeginde turǵan elordalyqtar qaıta qujat tapsyrýy tıis

ASTANA. QazAqparat - Astana qalasy ákimdiginiń «Turǵyn úı qory» KMM saıtynda baspana kezegindegi qujattaryn jańartýy tıis adamdardyń tizimi jarııalandy, dep habarlaıdy QazAqparat tilshisi.

Bul tizimde baspana kezeginde turǵan adamdardyń málimetteri, sanat jáne kezekke qoıylǵan kún týraly derekter kórsetilgen. Qujattardy jańartý 2022 jylǵy 14 jeltoqsanǵa deıin júrgizilýi tıis.

Osy tizimde jazylǵan adamdar Respýblıka dańǵyly 32-de (307 kabınet) ornalasqan Turǵyn úı ortalyǵyna myna qujattarmen kelýi tıis:

- jeke kýálik (otbasy músheleriniń qujattarymen birge);

- balalardyń týý týraly kýáligi;

- balanyń múgedektigi týraly anyqtama ;

- neke qııý/nekeni buzý / jubaıynyń (zaıybynyń) qaıtys bolǵany týraly kýálik / f-4 anyqtama;

- otbasy múshelerinde Qazaqstan Respýblıkasy boıynsha jyljymaıtyn múliktiń joq ekeni týraly anyqtama.

Atap aıtqanda, qujattardy bul tizimde belgilengen turǵyndar ǵana jańartýy tıis.