Baspana, kásipkerlik, agrosala: «Báıterek» holdınginiń basshysy Prezıdentke esep berdi
Memleket basshysy Qasym-Jomart Toqaev «Báıterek» ulttyq basqarýshy holdıngi» AQ basqarma tóraǵasy Nurlan Baıbazarovty qabyldady. Kazinform bul týraly Aqordaǵa silteme jasap habarlaıdy.
Prezıdentke holdıngtiń bıylǵy 9 aıdaǵy qyzmetiniń nátıjeleri, sonyń ishinde kásipkerlik pen agroónerkásip keshenin qoldaý, halyqty turǵyn úımen qamtamasyz etý baǵytynda atqarylyp jatqan jumystar jóninde baıandaldy.
Prezıdentke usynylǵan derekterge sáıkes, ınvestıtsııalyq jobalardy qarjylandyrý kólemi 511 mıllıard teńgeni quraǵan. Sonymen qatar shaǵyn jáne orta bıznestiń 18,1 myń jobasyna qoldaý kórsetilip, shamamen 1 trıllıon teńge kóleminde kredıt berilgen. Agroónerkásip keshenin qoldaýǵa 447 mıllıard teńge qarjy bólingen. Jyl basynan beri 811,2 myń sharshy metr turǵyn úı paıdalanýǵa berilip, 47 myńǵa jýyq otbasy baspanaly bolǵan.
Budan bólek, Memleket basshysyna holdıngti transformatsııalaý jáne tsıfrlandyrý úshin qabyldanyp jatqan sharalar týraly málimet berildi. «Báıterek» aldaǵy eki jylda ekonomıkanyń shıkizattyq emes sektoryn qoldaý aýqymyn eki ese arttyrmaq. Investıtsııa tartý jáne kommertsııalyq bankterdi óńdeý ónerkásibi jobalaryn kredıtteýge jumyldyrý jumystary jandana túsedi.
Іshki naryqty qamtamasyz etý jáne agroónerkásip kesheniniń eksporttyq áleýetin arttyrý maqsatynda tamaq ónerkásibi jobalaryn qarjylandyrý baǵdarlamalary iske qosylady, sondaı-aq tolyqqandy eksport-kredıt agenttigi qurylady.
Memleket basshysynyń monoqalalar, aýdan ortalyqtary men aýyl turǵyndaryn baspanamen qamtý jónindegi tapsyrmasyn oryndaý maqsatynda holdıngtiń turǵyn úı baǵytyndaǵy qyzmeti tranformatsııalanady.
Nurlan Baıbazarov holdıngke enshiles uıymdardyń barlyq qyzmetin tsıfrlyq formatqa kóshirý josparlanyp otyrǵanyn jetkizdi.
Kezdesý sońynda Memleket basshysy ekonomıkalyq ósimdi qoldaý jáne azamattardyń turmys deńgeıin jaqsartý úshin jańa tásilder engizý mańyzdy ekenin atap ótti. Sondaı-aq «Báıterek» holdınginiń jumysyn jetildirýge qatysty birqatar mindet júktedi.
