Baspana, bilim, áleýmettik kómek: Astanalyqtar ákimge qandaı máselemen jıi júginedi

NUR-SULTAN. QazAqparat - Nur-Sultan qalasynyń ákimi Altaı Kólginov Instagram paraqshasynda jyl basynan beri 300-ge jýyq azamatty qabyldaǵanyn málim etti, dep habarlaıdy QazAqparat.

«Azamattardy qabyldaýdy turaqty júrgizýdi jalǵastyramyz. Búgin taǵy 8 adamdy jeke qabyldadym. Jyl basynan beri 300-ge jýyq adam jumyspen qamtyldy. Qabyldaýda kóteriletin negizgi máseleler - turǵyn úı baǵdarlamalaryna qatysý, áleýmettik jáne medıtsınalyq kómek, eldi mekenderdi damytý, bilim alý, abattandyrý jáne basqalar.

Memleket basshysynyń tapsyrmasy boıynsha jeńildikpen beriletin qoljetimdi turǵyn úı, medıtsınalyq jáne ońaltý nysandary qurylysynyń kólemi ulǵaıdy. Mysaly, osy aıda kórý qabileti buzylǵan balalarǵa arnalǵan mamandandyrylǵan balabaqsha (Saryarqa aýdany, Kenesary kóshesi, 9/1) ashyldy. Qazir balalar mekemege baryp júr.

Balabaqshada tárbıeshilermen birge medıtsınalyq qyzmetkerler de jumys isteıdi. Sondaı-aq erekshe qajettiligi bar balalarǵa arnalǵan ońaltý ortalyǵynyń jelisin aıtarlyqtaı keńeıttik. Bul baǵyttaǵy jumystardy júıeli negizde jalǵastyramyz.

Azamattardy qabyldaýdan bólek qala turǵyndarymen ózara baılanysty nyǵaıtýǵa elorda aýdandary, sonyń ishinde eldi mekenderdi turaqty aralaý aıryqsha kómektesedi. Bul sharalar turǵyndardy barynsha kóp qamtýǵa múmkindik beredi.

Qala turǵyndary kótergen máselelerdi nazarǵa alyp, jumys isteıtin bolamyz», — dep jazdy elorda ákimi.