Baspana berilmegen eýropalyq mıgranttar Afrıkaǵa jóneltilmek

ASTANA. KAZINFORM — Germanııa, Avstrııa, Danııa, Nıderlandy jáne Grekııa baspana berýden bas tartqan mıgranttardy Rýandaǵa jiberý múmkindigin qarastyryp jatyr. Bul bastamany 2027 jyly júzege asyrý josparlanyp otyr, dep habarlaıdy Kazinform agenttigi DW-ge silteme jasap.

bejentsy
Foto: Anadolu Ajansı

Atalǵan jospar týraly Germanııanyń ishki ister mınıstri Aleksander Dobrındt 16 qarashada Venada ótken kóshi-qon máselelerine arnalǵan konferentsııada málimdedi.

Jospar boıynsha, Shyǵys Afrıkadaǵy Rýandada Eýroodaq aýmaǵynda bolý quqyǵynan aıyrylǵan mıgranttarǵa arnalǵan arnaıy ortalyqtar ashylady. Olardy shyqqan elderi keri qabyldaýǵa kelispegendikten ázirge otanyna qaıtarý múmkin bolmaı otyr.

Dobrındttiń sózinshe, joba ázirge talqylaýdyń bastapqy satysynda. Al Rýandamen kelissózderde eleýli nátıjege qol jetkizilgen.

Mınıstrdiń aıtýynsha, jappaı lagerler salý kózdelmegen. Onyń ornyna mıgranttarǵa kásiptik bilim berip, keıin olardy týǵan elderine qaıtarý múmkindigin qarastyratyn joba talqylanyp jatyr.

Germanııanyń ishki ister mınıstri bastamany júzege asyrý barysynda ulttyq zańnama men adam quqyqtary jónindegi halyqaralyq talaptar tolyq saqtalýǵa tıis ekenin atap ótti. Sondaı-aq bul iske halyqaralyq uıymdardy tartý josparlanyp otyr.

Alaıda bastama quqyq qorǵaýshylardyń synyna ushyrady. Atap aıtqanda, Pro Asyl uıymy Rýandada azaptaý men adamdardy negizsiz ustaý oqıǵalary týraly málimetterge súıenip, jobaǵa qarsy shyqty.

Kóshi-qon saıasaty talqylanǵan tusta Venada júzge jýyq adam usynylǵan deportatsııa tártibine qarsy narazylyq aktsııasyn ótkizdi.

Buǵan deıin Kanar araldaryna bir táýlikte rekordtyq 1 488 mıgrant kelgeni habarlanǵan bolatyn.