Baspana, balabaqsha, sport kesheni: Ekibastuzda kásiporyn jumysshylaryna áleýmettik nysandar salynady
ASTANA. KAZINFORM — «Samuryq-Energo» AQ Ekibastuz qalasynda jańa áleýmettik nysandar salady. Bul týraly uıymnyń basqarma tóraǵasy Qaırat Maqsutov aıtyp berdi.
Onyń aıtýynsha, Pavlodar oblysynda Samuryq-Energo tobynyń negizgi kásiporyndary ornalasqan. Óńirdegi qyzmetkerler sany shamamen 11 myń adamǵa jetedi.
— Sondyqtan kompanııa óziniń áleýmettik jaýapkershiligin sezinedi. Osyǵan baılanysty Ekibastuz qalasynda qyzmetkerlerge arnalǵan kópqabatty turǵyn úı, eki balabaqsha, sport keshenin salý týraly sheshim qabyldandy. Jobalardyń jalpy quny shamamen 20 mlrd teńge, — dedi Qaırat Maqsutov Úkimettiń búgingi otyrysynda.
Bul nysandar Pavlodar oblysy ákimdigimen jasalǵan memorandýmǵa sáıkes, úsh jyl merzimde salynady.
Sondaı-aq, «Taza Qazaqstan» baǵdarlamasy boıynsha, «Samuryq-Energo» ekologııalyq ahýaldy jaqsartý úshin qalany kógaldandyrýǵa jyl saıyn 100 mln teńgeden astam qarjy bóledi.
Buǵan deıin Qaırat Maqsutov Ekibastuz GRES úshinshi energoblogy 2028 jyly iske qosylatynyn aıtqan edi. Jańa energobloktardyń iske qosylýy qýat tapshylyǵyn jaýyp qana qoımaı, derekterdi óńdeý ortalyǵyn, protsessordy salqyndatý júıelerin damytýǵa múmkindik beredi.
