Baspana baǵasy jurtqa qoljetimdi bolýy qajet – Prezıdent

ASTANA. QazAqparat – Shymkentte mıllıon sharshy metrden astam turǵyn úı paıdalanýǵa beriledi. Bul týraly Prezıdent Qasym-Jomart Toqaev Shymkent qalasynyń jurtshylyǵymen kezdesýde aıtty, dep habarlaıdy QazAqparat tilshisi.

«Bıyl 1 mıllıon sharshy metrden astam turǵyn úı paıdalanýǵa beriledi dep josparlanǵan. Sonyń arqasynda 9 myńǵa jýyq otbasy qonystoı toılaıdy. Turǵyn úı qurylysynyń qarqynyn báseńdetpeý kerek. Eń bastysy, onyń baǵasy jurtqa qoljetimdi bolýy qajet. Ákimdik Úkimetpen osy baǵytta birlesip jumys atqarýǵa tıis», - dedi Memleket basshysy.

Aıta ketsek, QR Prezıdenti Shymkent qalasyna jumys saparymen kelgen bolatyn.