Baspana qunynyń ósýine eshqandaı negiz joq – Jumanǵarın
ASTANA. KAZINFORM – Qazaqstanda qazir turǵyn úıdiń qymbattaýyna eshqandaı negiz joq. Bul týraly QR Premer-mınıstriniń orynbasary – Ulttyq ekonomıka mınıstri Serik Jumanǵarın málim etti.
Búgin Parlament Májilisinde tilshiler Úkimet basshysynyń orynbasarynan «jaqynda elde avtokólik pen páter arzandaıdy degen pikir qanshalyqty ras?» dep surady.
- Qazirgi ýaqytta arzandaıdy degenge kúmánmen qaraımyn. Eger qymbattamasa, soǵan da rahmet. Atap aıtqanda, qazir úılerdiń qymbattaýyna eshqandaı alǵysharttar joq, - dedi Serik Jumanǵarın.
Buǵan deıin habarlanǵandaı, bıyl naýryz aıynda turǵyn úıdi satyp alý-satý mámileleriniń sany 3,9 paıyzǵa ósti.
Eske salsaq, byltyr jeltoqsan aıynda Ónerkásip jáne qurylys mınıstri Ersaıyn Naǵaspaev elimizde baspana baǵasynyń kóterilý múmkindigine qatysty pikir bildirdi.
