Basketbolshy qoıan álemdik rekord ornatty
ASTANA. QazAqparat - Kalıfornııada Bını esimdi bes jasar úı qoıany Gınnestiń rekordtar kitabynyń sońǵy basylymyna shyqqan erekshe haıýandardyń biri atandy. Bul týraly UPI portalyna siltememen «Habar 24» habarlady.
Aqyldy janýar basketbol oınap, bir mınýtta shyǵyryqqa 7 kishkene dopty dóp salǵan. Bundaı jetistikke ǵalamshardaǵy eshbir janýar áli jetip kórmegen.
Qoıannyń ıesi Shaı Asor Bınıdiń jetistikteri ony qatty qýantqanyn aıtady. «Bala kezimde jyl saıyn Gınnestiń rekordtar kitabynyń jańa basylymyn jibermeı oqıtynmyn. Endi sol kitaptan meniń de janýarymnyń oryn alǵany qatty qýantyp otyr», - deıdi amerıkalyq azamat.
Asordyń sózinshe, Bını kishkene jasynan beri dop oıyndaryn qatty unatqan. Buny baıqaǵan kalıfornııalyq ony jattyqtyra bastapty. Shaı Asor qoıannyń myqty sportshy ǵana emes, tipti keremet sýretshi ekenin jáne taraqty paıdalana biletindigin de jasyrmady.
