Basketboldan VIІ «Úmit kýbogi» týrnıri ótýde
ALMATY. 25 mamyr. QazAqparat /Ádilet Musahaev/ - Búgin «Qazaqstan Halyq Banki» AQ-nyń «Halyqtyq lıga» áleýmettik jobasy aıasynda «Úmit kýbogi - 2011» basketbol týrnırin ótkizip jatyr.
Jetinshi ret elimizdiń 14 oblysyndaǵy balalar úıleri men mektep-ınternattarynda tárbıelenýshi jasóspirimderdiń basyn qosyp otyrǵan keń aýqymdy jarys Aqmola oblysy Býrabaı aýdanynyń Şýchınsk qalasyndaǵy «Jaqsy» sport bazasynda ótýde.
31 mamyrǵa deıin jalǵasatyn týrnırge elimiz boıynsha 16 balalar úıi men mektep-ınternatynyń tárbıelenýshisi bolyp tabylatyn 1995 - 1996 jyldary týǵan jáne jasy odan kishi jas óspirim sportshylar qatysýda. Týrnır Qazaqstan Respýblıkasynyń Basketboldy damytý jónindegi Ulttyq federatsııasynyń qatysýymen, ulttyq jáne halyqaralyq sanattaǵy sýdıalardy tartý arqyly uıymdastyrylǵan.
«Qazaqstan Halyq Banki» AQ Basqarma Tóraǵasynyń orynbasary Stanıslav Kosobokov Bank qazaqstandyq óskeleń jas urpaqtyń deni saý bolyp ósýi úshin jas óspirimder arasynda dene shynyqtyrý men sportty barynsha damytýǵa múddelilik tanytyp otyrǵandyǵyn aıtady. «Biz elimizdiń erteńgi bolashaǵy - jetkinshekterimizdiń barlyǵynyń, onyń ishinde ata-ana qamqorlyǵynan aırylǵan jetim balalardyń da deni saý, erik-jigeri kúshti, rýhy myqty, joǵary sanaly azamat bolyp ósýin tileımiz. Bizdiń oıymyzsha, mundaı jarystardyń jas óspirimderdi shynyqtyrý úshin ǵana emes, olardyń boıynda qaırattylyq pen erik-jiger, patrıottyq rýh tárbıelep, qoǵamda óz ornyn tabýǵa umtylýǵa qolǵabys jasaýda da máni zor», - deıdi S. Kosobokov.
Sonymen qatar ol Respýblıkalyq «Úmit kýbogi» týrnıri - Halyq Bankiniń aýqymdy áleýmettik jobalarynyń bir bóligi ǵana ekendigin, onyń sheńberinde jyl saıyn Bank qamqorlyǵyndaǵy balalar mekemelerin sporttyq qural-jabdyqpen, arnaıy kıim-keshekpen qamtamasyz etý, balalarmen jumys isteıtin jattyqtyrýshylar quramyn irikteý jumysy júrgiziletindigin ári olardyń eńbegine aqy tólenetindigin jetkizdi.
«Halyqtyq Lıga» jobasy boıynsha balalar úıleri men mektep-ınternattar tárbıelenýshileri arasynda basketboldan ótkiziletin «Úmit kýbogi» týrnıri 2005 jylǵy 24 mamyrda Aqmola oblysynyń Jaqsy selosynda uıymdastyrylǵan respýblıkalyq jarystan bastaý alady. 2006 jylǵy ІІ Respýblıkalyq týrnır de sol jerde ótkizilgen bolatyn, atalǵan kýbok «Býrabaı» sanatorlyq-kýrorttyq aımaǵyndaǵy «Baldáýren» respýblıkalyq oqý-saýyqtyrý ortalyǵynda boldy. Al V jáne VI týrnırler Qostanaı oblysyndaǵy «Sosnovyı bor» sanatorııinde uıymdastyrylǵan.
